"რა არის "გაუგებარი"? იმ სესხზე უარის თქმაზე გასაგები რა უნდა იყოს?", — ასე ეხმაურება გირჩი — მეტი თავიფულსების ლიდერი, ზურაბ ჯაფარიძე საქართველოს პრეზიდენტს, სალომე ზურაბიშვილს, რომელმაც განაცხადა, რომ ქართული ოცნების მიერ ევროკავშირის დახმარების არმიღება, მისთვის "გაუგებარი ნაბიჯია".

"და რა თქვა ზურაბიშვილმა ასეთი? გაუგებარიაო? და რა არის გაუგებარი? იმ სესხზე უარის თქმაზე გასაგები რა უნდა იყოს? ნახუი გაუშვეს ამ ქვეყნის დასავლური მომავალი. მართლა გჯერათ, რომ ეს არ ესმის და გაუგებარია მისთვის? ევროკავშირის განცხადებიდანაც ვერ მიხვდა? თუ ესმის და ამ მასშტაბის პრობლემას აბაიბურებს სიტყვით "გაუგებარია" და პრობლემა სესხის აღება-არაღებამდე დაჰყავს, რამ აღგაფრთოვანათ? თუ არ ესმის და მართლა გაუგებრობა ჰგონია, მაშინ, მითუმეტეს, რამ აღგაფრთოვანათ? თუ თქვენც არ გესმით?", — წერს ჯაფარიძე საკუთარ Facebook-ზე.

დღეს, 2 სექტემბერს პრეზიდენტმა, სალომე ზურაბიშვილმა საგანგებო ბრიფინგი გამართა, რომელზეც ბოლო დღეებში ჭარბად დაგროვილი პოლიტიკური მოვლენები მიმოიხილა. მისი სიტყვა ძირითადად მმართველი გუნდის გადაწყვეტილებების კრიტიკას დაეთმო, თუმცა გაკრიტიკებას, ვერც ოპოზიცია, უფრო ზუსტად კი ნაციონალური მოძრაობა გადაურჩა. ზურაბიშვილმა რამდენჯერმე აღნიშნა, რომ მისთვისაც და ხალხისთვისაც გაუგებარია მთავრობის ლოგიკა ევროკავშირის სესხზე უარის თქმასთან დაკავშირებით. მეტიც პრეზიდენტმა ქართული ოცნების ქმედებები პარადოქსულადაც მოიხსენია და თქვა, რომ მათი არგუმენტები ანალიზს ვერ უძლებს.

საქართველომ ევროკავშირის მაკროფინანსური დახმარების მეორე ნაწილზე უარი თქვა. ამას წინ უძღოდა მმართველი პარტიის მიერ შარლ მიშელის დოკუმენტის ანულირებულად გამოცხადება, რაც 43%-იანი ბარიერის ვერგადალახვის შემთხვევაში რიგგარეშე არჩევნების ჩანიშვნაზე უარის თქმასაც გულისხმობს. ამასთან, დოკუმენტის მოთხოვნაა მართლმსაჯულების რეფორმა მხარეების ჩართულობით, მანამდე კი უზნაეს სასამართლოში მოსამართლეების დანიშვნისგან თავის შეკავება. ქართულმა ოცნებამ ეს პირობა არ შეასრულა, რის გამოც პარტნიორებისგან არაერთი კრიტიკა მიიღო. მეტიც, ამერიკის შეერთებული შტატების საელჩომ Twitter-ზე გამოაქვეყნა დოკუმენტის ფოტო, სადაც ეს მოთხოვნები ყვითლად იყო მონიშნული. ამის შემდეგ პრემიერმინისტრი ირაკლი ღარიბაშვილი უკრაინაში ევროპული საბჭოს პრეზიდენტს, შარლ მიშელს შეხვდა, რომელმაც შეხვედრის შემდეგ განაცხადა, რომ რეფორმები ახლა ისეა საჭირო, როგორც არასდროს. მისივე თქმით, "მოსალოდნელი მაკროსაფინანსო დახმარების გაცემის ვადა ახლოვდება და დროა, საქართველოს მთავრობამ აჩვენოს, რომ ერთგულია შეთანხმების, განსაკუთრებით რეფორმების ნაწილში".

ამის შემდეგ ქართული ოცნება ამ დახმარების მიღების მიზანშეუწონლობაზე ალაპარაკდა. მათი მტკიცებით, მთავრობამ დაიწყო საგარეო ვალის შემცირება და ამ თანხის მიღების აუცილებლობა, სავარაუდოდ, აღარ იქნება. ირაკლი კობახიძემაც თქვა, რომ ამ დახმარებას "ფინანსური დატვირთვა აღარ აქვს". დახმარების არგამოყოფის შემთხვევაში პოლიტიკურ დატვირთვასთან დაკავშირებით კი კობახიძე აცხადებს, რომ ქართულ ოცნებას ეს გაცნობიერებული აქვს და ყველაფერი ევროკავშირის გადასაწყვეტია, "მაგრამ ქართული ოცნება თავიდან ბოლომდე მოქმედებს ქვეყნის და ჩვენი სტრატეგიული პარტნიორების ობიექტური ინტერესების შესაბამისად".

ოპოზიცია და ექსპერტების ნაწილი მიიჩნევს, რომ რეალურად ქართულმა ოცნებამ იცოდა, რომ ევროკავშირს პირობების შეუსრულებლობის გამო დახმარებაზე უარის თქმა ჰქონდა გადაწყვეტილი და თავად დაასწრო უარი. ევროკავშირის წარმომადგენლობის განცხადებით, პატივს სცემენ ხელისუფლების გადაწყვეტილებას, არ მიიღოს მაკროფინანსური დახმარება, თუმცა საქართველომ მისი მიღების პირობები ვერ შეასრულა. მათი თქმით, საქართველოსთვის გასაცემი დახმარება დამოკიდებული იქნება ძირითადი რეფორმების განხორციელებისას მიღწეულ წინსვლაზე.