მოქმედი პრემიერმინისტრი, ირაკლი ღარიბაშვილი ექსპრემიერ გიორგი გახარიას კანდიდატურაზე საუბრისას ამბობს, რომ მოსახლეობა არჩევანს გააკეთებს ერთგულებასა და ღალატს და მადლიერებასა და უმადურობას შორის. ამ შემთხვევაში ის გახარიას კახა კალაძეს ადარებს, თუმცა არ აკონკრეტებს ვის მიმართ არის უმადური ყოფილი თანაგუნდელი.

"2 ოქტომბერს, კახი კალაძე გაიმარჯვებს ღირსეულად და დამაჯერებლად. მოსახლეობა კიდევ ერთხელ არჩევანს გააკეთებს ერთგულებას და ღალატს შორის, ასევე სიმართლეს და ტყუილს შორის, მადლიერებას და უმადურობას შორის. აი, ეს არის ჩემი სათქმელი", — თქვა ირაკლი ღარიბაშვილმა.

შეხვედრის შესახებ ინფორმაცია ქართული ოცნების ლიდერებმა მას შემდეგ გაავრცელეს, რაც გახარიამ თქვა, რომ თბილისის მერობისთვის იბრძოლებს. ირაკლი კობახიძემ, მამუკა მდინარაძემ და კახა კალაძემ თქვეს, რომ გახარიას კალაძესთან კომუნიკაციის რამდენიმე მცდელობა ჰქონდა და საბოლოოდ, შეხვედრა პირველ სექტემბერს, თბილისის მერიაში შედგა. მეტიც, კობახიძე და მდინარაძე საუბრობენ იმაზე, თითქოს გახარია მზად იყო, ქართული ოცნების მხრიდან ფინანსური დახმარების სანაცვლოდ საკუთარი კანდიდატურა არ დაეყენებინა. თავად გახარიამ ქართული ოცნების ლიდერების ამ განცხადებებს ტყუილი უწოდა და თქვა, რომ მათ სიტყვას ფასი არ აქვს.


ირველ სექტემბერს ცნობილი გახდა, რომ ექსპრემიერი გიორგი გახარია თბილისის მერობისთვის იბრძოლებს. ამან მისი ყოფილი თანაგუნდელების მორიგი კრიტიკა გამოიწვია. მამუკა მდინარაძის განცხადებით, "მელიასთვის გადადგა და ახლა მელიას მეორე ტურში გასათრევად იწყებს ბრძოლას", ხოლო ირაკლი კობახიძე ამბობს, რომ "არჩევნები არ არის ოლიმპიადა, რომ ბრინჯაოს მედლისთვის იბრძოლო და "მესამე ადგილისთვის არ იბრძვიან არჩევნებში".