გახარიას პარტიის ოზურგეთის მერობის კანდიდატი, გია ცეცხლაძე ძმები თალაკვაძეებს ზეწოლაში ადანაშაულებს. საქართველოს წარმომადგენლის თქმით, დაბა ნასაკირალის მაჟორიტარობის კანდიდატმა, ნონა ტუნაძემ კანდიდატურა მას შემდეგ მოხსნა, რაც პარლამენტის ყოფილი თავმჯდომარე და მისი ძმა, რომელიც ახლა მერობის კანდიდატია, დაემუქრნენ.

"ძმები თალაკვაძეები გუშინ იმყოფებოდნენ დაბა ნასაკირალში, იმყოფებოდნენ ქალბატონ ნონა წუნაძესთან სახლში, სადაც მოხდა მასზე ზეწოლა, რომ მოეხსნა კანდიდატურა, ალბათ რაღაცის სანაცვლოდ. ვთხოვ შესაბამის ორგანოებს, დაინტერესდნენ ამ ფაქტით და მიაქციონ ყურადღება. ეს არ არის პირველი და უკანასკნელი ფაქტი. დაშინებების შემთხვევები ხშირია ჩვენს კანდიდატებზე", — თქვა გია ცეცხლაძემ.

ავთანდილ თალაკვაძე გიორგი გახარიას გუნდის წევრების ბრალდებებს უარყოფს და ამბობს, რომ ცეცხლაძის კამპანია წარუმატებელია და ამიტომ ცდილობს, ეს ქართულ ოცნებას დააბრალოს.

"ცეცხლაძის წინასაარჩევნო კამპანია არის წარუმატებელი, დღემდე ოზურგეთში არ იციან მისი საარჩევნო პროგრამის შესახებ. როგორც ჩანს შტაბი ეშლებათ და ჩვენზე ცდილობენ გადმობრალებას. თავიდანვე ცდილობდნენ, საზოგადოება შეცდომაში შეეყვანათ, თითქოს ქართულ ოცნებასთან შეთანხმებით მოქმედებდნენ და აშკარაა, რომ მათი პარტია დღემდე ქართული ოცნების ხმებს ეპოტინება", — თქვა ავთანდილ თალაკვაძემ.

ავთანდილ თალაკვაძე პარლამენტის ყოფილი თავმჯდომარის ძმაა, სწორედ ის დაასახელა ქართულმა ოცნებამ ოზურგეთში მერობის კანდიდატათ.