მეწარმეობა ქვეყნის ეკონომიკური განვითარების მნიშვნელოვანი წინაპირობაა. აქ განსაკუთრებული მნიშვნელობა ინოვაციურ იდეებს ენიჭება, რაგან როდესაც რაღაც ახალი და საინტერესო იქმნება, ეს ბევრი ადამიანის ყურადღებას იპყრობს. სამეწარმეო სფეროში მთავარია სწორი იდეა და მისი განხორციელების გზების ძებნა. ისინი, ვინც ამ საქმეს ხელს უწყობენ, ქვეყნის ეკონომიკურ განვითარებაში მნიშვნელოვან ინვესტიციას დებენ.

სწორედ ინოვაციური სამეწარმეო იდეების ხელშეწყობის მიზნით ტარდება მეწარმეობის მსოფლიო თასის კონკურსი (EWC), რომელშიც წელს, საერთაშორისო დონეზე, მონაწილეობა 150 000-ზე მეტმა სტარტაპმა მიიღო. საქართველოში კონკურსის ადგილობრივი ფინალი უკვე გაიმართა, სადაც სტარტაპმა Slack გაიმარჯვა და გლობალური ფინალისტი გახდა. მეორე ადგილი Dinespace-სს ერგო, რომელმაც 3 000-ლარიანი ფულადი ჯილდო მიიღო.

კონკურსის მხარდამჭერი ბილაინია — კომპანიაში ამბობენ, რომ ციფრული პროდუქტებისა და სტარტაპ ეკოსისტემის განვითარებაზე ზრუნვა მათი სტრატეგიის განუყოფელი ნაწილია და მსგავსი ღონისძიებების მხარდაჭერას მომავალშიც გააგრძელებენ.

Entrepreneurship World Cup Georgia-ს ფინალში რვა გუნდი გავიდა. სტატიის მომდევნო ნაწილში კონკურსის პირველი და მეორე ადგილების მფლობელებს გაგაცნობთ. აქ ნამდვილად დარწმუნდებით, რომ საქართველოში ინოვაციურ სამეწარმეო იდეებს დიდი მომავალი აქვს.

Stack

ფოტო: Stack

Stack ინტერნეტ ბრაუზერია, რომელიც მომხმარებლებს შესაძლებლობას აძლევს უკეთ მოახდინონ ვებ კონტენტის ორგანიზება, განახორციელონ ნავიგაციის პროცესი სხვა ბრაუზერებთან შედარებით ორჯერ უფრო სწრაფად და შეასრულონ ამოცანები დაბრკოლებების გარეშე.

Stack-ის გუნდმა საქმიანობა 2018 წელს დაიწყო. კომპანიაში მიხვდნენ, რომ ბაზარზე არსებული ბრაუზერები 20 წელზე მეტია, რაც არ შეცვლილა და ისინი ვეღარ აკმაყოფილებენ მომხმარებელთა მოთხოვნებს და სწორედ თანამედროვე მოთხოვნებზე საპასუხოდ შექმნეს Stack.

ფოტო: ბილაინ

"როდესაც ბრაუზერები შეიქმნა, მათი მთავარი ფუნქცია ერთი საიტიდან მეორეზე გადასვლა იყო, ინფორმაციის მოძიება და სხვა. დღეს ინტერნეტი რადიკალურად შეიცვალა და შეიცვალა მომხმარებელთა ქცევა ინტერნეტში მუშაობისას. ახლა საიტების გახსნის მაგივრად ვიყენებთ სხვადასხვა ვებ აპლიკაციას.

Stack-ში რამდენიმე აპლიკაციის ერთდროულად გახსნა არის შესაძლებელი. ამასთან, ეს ბრაუზერი სისწრაფითაც გამოირჩევა, რაც მომხმარებელს საშუალებას აძლევს ეგრეთ წოდებული შორთქათების საშუალებით სწრაფად მიაგნოს მისთვის სასურველ აპლიკაციას", — ამბობს სტარტაპის თანადამფუძნებელი გიორგი ლალიაშვილი.

Stack-ის თანადამფუძნებელი გიორგი ლალიაშვილი Entrepreneurship World Cup-ის შესახებ საუბრისას კონკურსის გლობალურ ფინალთან დაკავშირებულ მოლოდინებზე ამახვილებს ყურადღებას. მისი თქმით, ეს კონკურსი ძალიან კარგი პლატფორმაა მათთვის, რათა პოტენციურ მომხმარებლებსა და პარტნიორებს ხმა მიაწვდინონ.

გადავლახეთ მეწარმეობის მსოფლიო თასის ადგილობრივი ეტაპი. ახლა, 4 კვირის განმავლობაში, გვექნება მენტორებთან სამუშაო სესიები. პირველი ჩართვა უკვე გვქონდა, სადაც ორგანიზატორებმა დაგვაკვალიანეს, თუ როგორ უნდა მოვემზადოთ ფინალური სესიისთვის. მომავალი შეხვედრებისთვის ველოდებით კონკრეტული სპეციალობის მენტორებისგან დახმარებას იმ მიმართულებებზე, რომლებიც ჩვენთვის არის რელევანტური

ამბობს გიორგი ლალიაშვილი.

როგორც კომპანიის თანადამფუძნებელი გვიყვება, Stack-ს 15 000-ზე მეტი მომხმარებელი ჰყავს, რომლებიც ბრაუზერს აქტიურად იყენებენ. მისივე თქმით, ახლა ცვლიან ტექნოლოგიას, რომელზეც Stack იქნება დაწერილი. კომპანიის მიზანია, მომავალი წელიწად-ნახევრის განმავლობაში მომხმარებელთა რაოდენობა ნახევარ მილიონამდე გაზარდოს.

Dinespace

ფოტო: Facebook / Dinespace

Dinespace არის პლატფორმა, რომლის მეშვეობით მომხმარებელს შეუძლია აირჩიოს სასურველი დრო, კერძი და რესტორანაში მისვლამდე წინასწარ გააკეთოს შეკვეთა. იქიდან გამომდინარე, რომ ანგარიშის წინასწარ გადახდაც შესაძლებელია, მომხმარებელი დროს ამ ნაწილშიც ზოგავს. ეს სტარტაპი Entrepreneurship World Cup-ის ადგილობრივი ფინალის ფარგლებში მეორე ადგილზე გავიდა.

ფოტო: ბილაინი

"Dinespace ეხმარება რესტორნების მომხმარებლებს, რათა დრო აღარ დაკარგონ კერძის კეთების ლოდინში. ეს განსაკუთრებით საინტერესოა დატვირთული გრაფიკის მქონე თანამშრომლებისთვის, ვისაც უწევს ოფისში მიირთვას მოკლე შესვენებების გამო", — ამბობს Dinespace-ის დირექტორი მიქაელ ჩიქოვანი.

კომპანიაში ამბობენ, რომ მუშაობენ როგორც საქართველოს, ასევე გერმანიის ბაზრებზე. ამასთან, გამოხმაურებები მიიღეს დიდ ბრიტანეთშიც. ახლა მობილური აპლიკაციის მზადების პროცესში არიან და ძირითად აქცენტს გერმანული ბაზრის სრულყოფილად ათვისებაზე აკეთებენ.

მომხმარებელს უკვე შეუძლია, კერძები და სასმელი წინასწარ შეუკვეთოს ჩვენი ვებსაიტის მეშვეობით dinespace.ge. სულ მალე მობილური აპლიკაციაც მზად იქნება. ჩვენ ვმუშაობთ საქართველოს და გერმანიის ბაზრებზე. დიდი გამოხმაურება მივიღეთ როგორც საქართველოში, ასევე დიდ ბრიტანეთსა და გერმანიაში. ამჟამად ჩვენ ძირითადი ფოკუსი გვაქვს გერმანიაზე, სადაც ვქმნით პარტნიორ რესტორანთა ქსელს და პარტნიორობას ვამყარებთ სხვადასხვა ფირმებთან. ამავდროულად, ჩვენ გვყავს საქართველოს გუნდი, რომელიც იზრუნებს დაინსფეისის თბილისსა და ბათუმში განვითარებისთვის

ამბობს მიქაელ ჩიქოვანი.

Dinespace-ში Entrepreneurship World Cup-ის შესახებ საუბრისას აღნიშნავენ, რომ ეს კონკურსი მათი სამომავლო ხედვების გაუმჯობესებაში დაეხმარა. ამასთან, მათი თქმით, აპირებენ, რომ მიღებული ფულადი პრიზი პროდუქტის განვითარებას მოახმარონ.

ბილაინში კი აღნიშნავენ, რომ მეწარმეობის ხელშეწყობის პროცესში კერძო სექტორის ჩართულობა ძალიან მნიშვნელოვანია. ამ მიმართულების მხარდაჭერის მიზნით, კომპანია სტარტაპებთან სხვადასხვა ტიპის თანამშრომლობას აანონსებს.

"ჩვენ მხარს ვუჭერთ ანტრეპრენერშიპის ხელშეწყობაზე მიმართულ ღონისძიებებს და ვთვლით, რომ ამ მიმართულებით ქვეყნის განვითარება უმნიშვნელოვანესია. სტარტაპ ეკოსისტემის შექმნაში კერძო სექტორს უდიდესი წვლილის შეტანა შეუძლია. სწორედ ამიტომ, მხარს ვუჭერთ მეწარმეობის მსოფლიო თასის კონკურსის ჩატარებას საქართველოში, რომელიც ქართველ ანტრეპრენერებს განვითარებასა და წინსვლაში დაემხარება. ბილაინი აქტიურად აგრძელებს თანამშრომლობას სტარტაპებთან სხვადასხვა მოდელით — მათ შორის, გეგმავს და ახორციელებს საერთო პროექტებსაც", — ამბობენ ბილაინში.

მეწარმეობის მსოფლიო თასის ღონისძიებაში 2021 წელს 200 ქვეყნის 150 000-ზე მეტმა კონკურსანტმა მიიღო მონაწილეობა. გლობალური ფინალისტები ერთმანეთს Misk Global Forum-ზე, რიადში, საუდის არაბეთში, ნოემბერში შეხვდებიან.