ერთიანი ნაციონალური მოძრაობის განცხადებით, ირაკლი ჩხვირკიას განცხადება, ბათუმში განვითარებულ მოვლენებზე, არ წარმოადგენს მათი პარტიის პოზიციას.

ამის შესახებ, ენმ სპეციალურ განცხადებას ავრცელებს. მათივე ცნობით, ამ დროისთვის ირაკლი ჩხირკვია პარტიიდან გარიცხულია.

"ბათუმში განვითარებულ მოვლენებთან დაკავშირებით, პარტიასთან შეუთანხმებლად ირაკლი ჩხვირკიას მიერ გაკეთდა არაერთი განცხადება და ქმედება, რომელიც არ გამოხატავდა ერთიანი ნაციონალური მოძრაობის პოზიციას. მეტიც, მისი ქმედებები ენმ-ის პოზიციის საწინააღმდეგო იყო".

ენმ-ის პრესსამსახურმა On.ge-ს განუცხადა, რომ სწორედ მის მიერ გაკეთებული განცხადებების გამო, პარტიის გადაწყვეტილებით, ირაკლი ჩხირკვია პარტიიდან გარიცხულია.

ირაკლი ჩხვირკიამ, ბათუმში, ნიღბიან ახალგაზრდებთან ერთად, 12 მარტს, გამთენიისას, სპეციალური განცხადება გაავრცელა და ხელისუფლებას ულტიმატუმი წაუყენა, ხოლო ქვების სროლასა და ქუჩებში ცეცხლის დანთებაზე 1,5-საათიანი მორატორიუმი გამოაცხადა.

ჩხვირკიამ მოითხოვა, საპატრულო პოლიციის უფროსის გადადგომა და შსს-დან მისი გათავისუფლება. ის ასევე, არეულობაში მონაწილეების სახელით ითხოვს შს მინისტრთან შეხვედრას და მისგან აღნიშნული პირებისთვის ხელშეუხებლობის გარანტიის მიღებას.