შს მინისტრმა გიორგი მღებრიშვილმა ბათუმში გამგზავრებამდე ჟურნალისტებთან კომენტარი გააკეთა და აღნიშნა, რომ ის რაც ბათუმში ხდება მიუღებელია.

მინისტრი ასევე ადასტურებს, რომ დაკავებულების გათავისუფლებას დათანხმდა, თუმცა მისივე თქმით, მათ მიმართ ადმინისტრაციული სამართალწარმოება არ შეწყდება:

"მე გავითვალისწინე აჭარის მთავრობის თავმჯდომარის თხოვნა, რომ გამეთავისუფლებინა ადმინისტრაციული წესით დაკავებული პირები, მიუხედავად ამისა მათ მიმართ ადმინისტრაციული სამართალწარმოება არ შეწყვეტილა. ეს ადამიანები აუცილებლად წარსდგებიან სასამართლოს წინაშე. ის რაც ახლა ბათუმში ხდება არის ყოვლად მიუღებელი და ამაზრზენი. მსგავსი პროვოკაციული მოქმედებები ვერავითარ შემთხვევაში ვერ შეუშლის ხელს კანონის აღსრულებას, სამართალდამცავთა მუშაობას. ყველა ის პირი ვინც თავის თავს კანონზე მაღლა აყენებს უმკაცრესად დაისჯება. ჩვენ ყველა თანასწორები ვართ კანონის წინაშე".

აჭარის პოლიციის მთავარ სამმართველოსთან უკვე რამდენიმე საათია საპროტესტო აქცია მიმდინარეობს.

ყველაფერი იმით დაიწყო, რომ 11 მარტს პატრულმა მოძრაობის შეფერხებისთვის მოქალაქე დააჯარიმა, რასაც სიტყვიერი და ფიზიკური დაპირისპირება, მოგვიანებით კი საპროტესტო აქცია მოჰყვა.