სახელმწიფო უსაფრთხოების სამსახურის უფროსის ყოფილი მოადგილე, სოსო გოგაშვილი პოლიტიკაში ბრუნდება. ამის შესახებ მან სოციალურ ქსელში დაწერა. გოგაშვილის თქმით, 2012 წელს ჰქონდა ოცნება, რომ უკეთეს საქართველოში იცხოვრებდა, თუმცა ეს ოცნება ქართულმა ოცნებამ დაუნგრია. გოგაშვილი სახალხო პარტიაში ბრუნდება, რომლის წევრიც, როგორც თვითონ ამბობს, 27 წლის წინაც იყო.

"გავკადნიერდები და ვიტყვი, რომ ამერიკული დემოკრატიის ერთ-ერთი ყველაზე თვალსაჩინო წარმომადგენლის, მარტინ ლუთერ კინგის მსგავსად, 2012 წლის გარიჟრაჟზე, მეც მქონდა ოცნება, რომ უკეთეს საქართველოში ვიცხოვრებდით, სადაც დემოკრატია, სამართლიანობა და თანასწორობა იზეიმებდა. გამოჩნდა თითქოს კიდევ ერთი იმედის ნაპერწკალი წლების შემდეგ, მაგრამ სამწუხაროდ ჩემი და ჩემი თანამოაზრეების ეს ოცნება "ოცნებამვე" დაანგრია.

ისევ იმ მორევმა ჩაგვითრია, სადაც ბედნიერად თავს მხოლოდ ერთეულები გრძნობენ. ვთვლი, რომ ახლა, ჩემი მხრიდან მხოლოდ დამკვირვებლის სტატუსით ყოფნა დანაშაულის ტოლფასია. გადავწყვიტე დავბრუნდე სახალხო პარტიაში, სადაც პირველი პოლიტიკური გამოცდილება მივიღე. პარტიაში, სადაც კვლავ ცოცხალია ეროვნული მუხტი და იდეალები", — წერს გოგაშვილი სოციალურ ქსელში.

სუს-ის უფროსის ყოფილმა მოადგილემ ქართული ოცნება 2020 წლის ოქტომბერში, საპარლამენტო არჩევნებამდე რამდენიმე კვირით ადრე დატოვა. "საერთოდ არ მაინტერესებს, რა დატოვა, ან სად წავიდა სოსო გოგაშვილი", — ასე გამოეხმაურა ექსპრემიერ, გიორგი გახარია გოგაშვილის პარტიიდან წასვლას. თავის მხრივ, გახარიას პრემიერმინისტრობიდან გადადგომას გოგაშვილი ასე გამოეხმაურა: "ცრუ კერპების დანგრევა გრძელდება".

გაიგე მეტი: