სახელმწიფო უსაფრთხოების სამსახური რუსეთის საოკუპაციო ძალების მიერ, შსს-ს თანამშრომლის სავარაუდო გატაცების ფაქტს არ ადასტურებს და განმარტავს, რომ "გაუგებრობას ჰქონდა ადგილი". ამის შესახებ, სუს-ის პრესსამსახურმა On.ge-ის განუცხადა:

"გატაცების ან დაკავების ფაქტს ადგილი არ ჰქონია. ადგილი ჰქონდა გაუგებრობას, რაც უკვე მოგვარებულია და ამჟამად იგი დისლოკაციის ადგილზე იმყოფება".

სახელმწიფო უსაფრთხოების სამსახურში არ აკონკრეტებენ, თუ რა გაუგებრობას ჰქონდა ადგილი და ამბობენ, რომ მეტ ინფორმაციას ვერ გაავრცელებენ.

დღეს, რუსთავი 2-მა, ადგილობრივებზე დაყრდნობით გაავრცელა ინფორმაცია, რომ რუსეთის საოკუპაციო ძალებმა, სოფელ ზარდიანთკართან, საოკუპაციო ხაზთან შსს-ს თანამშრომელი გაიტაცეს. კერძოდ, შსს-ს განსაკუთრებულ დავალებათა შიდა ქართლის სამმართველოს თანამშრომელი.