კონკიას შესახებ შემორჩენილ უძველეს ზღაპარზე უამრავი მულტფილმი, ფილმი, მიუზიკლი, სპექტაკლი თუ ბალეტი შექმნილა და მათ რიგებს მალე კიდევ ერთი კინოეკრანიზაცია შეემატება.

ახალ ფილმში, სახელწოდებით კონკია, მთავარ როლს კუბური წარმოშობის ამერიკელი მომღერალი კამილა კაბეიო ასრულებს. მის მოწინააღმდეგედ — მჩაგვრელი დედინაცვლის როლში მოგვევლინება ასევე ცნობილი მომღერალი და მსახიობი იდინა მენზელი (დისნეის ანიმაცია გაყინულის პოპულარული საუნდტრეკის Let It Go შემსრულებელი), რაც გარანტიას გვაძლევს, რომ ბევრ მუსიკალურ სანახაობას შემოგვთავაზებენ.

ცოტა ხნის წინ გამოქვეყნდა ფილმის პირველი ტრეილერი, სადაც ჩანს, რომ ამბის მთავარი გმირი — კონკია პრინცს კი არ ეძებს, არამედ კარიერული ოცნებების ახდენა სურს.

აღსანიშნავია, რომ ამ ფილმის იდეა მსახიობსა და ტელეწამყვან ჯეიმს კორდენს ეკუთვნის, რომელიც ასევე ეპიზოდური როლით იღებს მონაწილეობას ფილმში.

მთავარი სიურპრიზი კი, ალბათ, მაინც ბილი პორტერია: სერიალ Pose-ის (პოზა) ვარსკვლავი ჯადოქარი ნათლიის როლში მოგვევლინება.

ფოტო: Amazon

მართალია, კონკიას ისტორიას მაყურებელთა უმეტესობა დისნეის 1950 წლის ანიმაციური ფილმით იცნობს, მაგრამ ამ თანამედროვე ეკრანიზაციაზე დისნეის არ უმუშავია: თავდაპირველად Sony Pictures-მა დაიწყო პროექტის განხორციელება, მოგვიანებით კი გადაწყვიტეს, რომ ფილმი კინოთეატრებში პრემიერის ნაცვლად პირდაპირ ონლაინ, სტრიმინგ სერვისზე Amazon Prime Video გამოვიდეს 3 სექტემბერს.