მთავარი არხის დირექტორის, ნიკა გვარამიას მიერ, სავარაუდოდ, სუს-ის დოკუმენტების გასაჯაროებაზე ქართული ოცნების თავმჯდომარე, ირაკლი კობახიხე ირწმუნება, რომ სახელმწიფო უსაფრთხოების სამსახური ძლიერი ინსტიტუტია და რადიკალური ოპოზიციის მხრიდა ამიტომ არის დარტყმის საგანი.

"სახელმწიფო უსაფრთხოების სამსახური ძლიერი ინსტიტუტია, აქედან გამომდინარე ის არის დარტყმის საგანი რადიკალური ოპოზიციის მხრიდან. მათ შორის ფეიკ ნიუსებით ხდება ასეთი დარტყმების განხორციელება, თუმცა სუს-ის სიძლიერეს ვერავინ შეარყევს. ეს არის ის სამსახური, რომელიც ყოველდღიურად ზრუნავს ჩვენი ქვეყნისა და თითოეული მოქალაქის უსაფრთხოებაზე", — განაცხადა ირაკლი კობახიძემ.

მთავარი არხის დირექტორმა ნიკა გვარამიამ განაცხადა, რომ მოიპოვა სახელმწიფო უსაფრთხოების სამსახურის დოკუმენტები, სადაც პოლიტიკოსებზე, სასულიერო პირებზე, ჟურნალისტებზე, ბიზნესმენებზე, საჯარო მოხელეებზე თვალთვალია ასახული. სავარაუდოდ, სუს-ის ჩანაწერებიდან, ირკვევა, რომ უწყებაში აქვთ ინფორმაცია ხსნებული საზოგადოებაში აქტიური პირების სექსუალური ორიენტაციის, პირადი ცხოვრების, სექსუალური პარტნიორების შესახებ და ეს ყველაფერი აღწერილია უწყების დოკუმენტში. ისევე, როგორც ჟურნალისტების სატელეფონო ზარები სხვადასხვა უწყებების პრესსამსახურებთან. გვარამია ამბობს, რომ ეს ჩანაწერები ქართული ოცნების დამფუძნებლის, ბიძინა ივანიშვილისთვის კეთდება და პროცესში სუს-ის უფროსები არიან ჩართული.

On.ge დაუკავშირდა სახელმწიფო უსაფრთხოების სამსახურს იმის გასარკვევად, რა რეაგირება ექნებათ ამ ინფორმაციაზე. უწყებაში თქვეს, რომ ამ საკითხზე კომენტარს არ გააკეთებენ.

ამასთან, საერთაშორისო გამჭვირვალობა — საქართველოს დირექტორის მოადგილე, გიორგი ონიანი, GDI-ს დამფუძნებელი, გიორგი მშვენიერაძე და სოციალური სამართლიანობის ცენტრის წარმომადგენელი, გურო იმნაძე ადასტურებენ, რომ გვარამიას გამოქვეყნებულ ჩანაწერებში აღწერილი დიალოგი შედგა.