Philip Morris International-ის აღმასრულებელმა დირექტორმა და აშშ-ის გარეთ მარლბოროს სიგარეტების მწარმოებელმა იაცეკ ოლჩაკმა განაცხადა, რომ თავისი კომპანია მომდევნო ათწლეულის განმავლობაში, გაერთიანებულ სამეფოში სიგარეტების გაყიდვას შეწყვეტს.

ოლჩაკის თქმით, ეს გადაწყვეტილება ტრადიციული სიგარეტების მოხმარებისა და მათი კვამლის შემცირებას და თანდათანობით გაქრობის მიზანს ემსახურება. ბიზნესმენმა გაერთიანებული სამეფოს მთავრობასაც მიმართა და ათწლეულის განმავლობაში სიგარეტების მიმართ იმგვარი პოლიტიკის გატარება ურჩია, რაც გაზზე მომუშავე მანქანებისადმი განხორციელდება — ამგვარი ტრანსპორტი 2030 წლიდან ქვეყანაში აღარ გაიყიდება.

"ჩვენ შეგვიძლია, სამყარო სიგარეტების გარეშე დავინახოთ", — ამბობს ოლჩაკი, — "და, რეალურად, რაც უფრო მალე მოხდება ეს, მით უკეთესი იქნება ყველასთვის. სწორი რეგულაციებითა და ინფორმაციით ეს რამდენიმე ქვეყანაში, შესაძლოა, 10 წელიწადში მოხდეს. ასე თქვენც შეგიძლიათ, პრობლემა ერთხელ და სამუდამოდ გადაჭრათ".

ფოტო: Getty Images

აღსანიშნავია, რომ Philip Morris International 2008 წლის შემდეგ გაემიჯნა Philip Morris USA-ის, რომელიც მარლბოროს სიგარეტებს აშშ-ში აწარმოებს. Philip Morris International-მა კი ცოტა ხნის წინ განაცხადა, რომ კომპანიის გარდაქმნას აპირებდა; ამასთან, ბრენდს ბრიტანული ფარმაცევტული კომპანიის შესყიდვაც სურს, რომელიც ინჰალატორებს აწარმოებს.

აღნიშნული მიზნები ბრიტანეთში მოწევის საწინააღმდეგო მოძრაობებმა გააკრიტიკეს და თამბაქოს მწარმოებელ კომპანიებს ფარისევლობაში დასდეს ბრალი.

ჯანდაცვის მსოფლიო ორგანიზაციის მონაცემებით, მოწევა ყოველწლიურად 8 მილიონი ადამიანის სიკვდილს უკავშირდება.