საქართველოს სახალხო დამცველს, უჩა ნანუაშვილს მიაჩნია, რომ მწვანე საფართან დაკავშირებულ კანონპროექტს, რომელსაც პარლამენტი განიხილავს, ვერ აგვარებს ხეების მდგომარეობისა და დაავადებული მწვანე ნარგავების განკურნებასთან დაკავშირებულ პრობლემებს. საკანონმდებლო ინიციატივით, მოქმედი კანონიდან ქრება ხეების ჭრისთვის თანხის გადახდის ვალდებულება.

"იმ პირობებში, როდესაც დედაქალაქში მწვანე საფარისა და ზოგადად, ეკოლოგიის კუთხით მძიმე მდგომარეობაა შექმნილი, ხოლო ახალი მშენებლობები რეალურად უსისტემოდ მიმდინარეობს და დარჩენილ მწვანე ზონებს ემუქრება, სახალხო დამცველს მიაჩნია, რომ საქართველოს პარლამენტმა პირველ რიგში ყურადღება უნდა მიაპყროს გარემოს დაცვის ინტერესებს, ჯანსაღ გარემოში ცხოვრების უფლების რეალიზებას და ახალი რეგულაციები მათზე დაყრდნობით მიიღოს," - აღნიშნავს სახალხო დამცველი, რომელსაც მიაჩნია, რომ საკანონმდებლო ინიციატივები მწვანე საფარის დაცვისკენ უნდა იყოს მიმართული.

2016 წლის დეკემბერში სამშენებლო კომპანია m2-მა ხე-მცენარეების მოჭრის პროცედურის გამარტივების მოთხოვნით წერილით პარლამენტის თავმჯდომარეს, ირაკლი კობახიძეს მიმართა.

„თბილისის ტერიტორია არსებითად დაფარულია მწვანე საფარით. შესაბამისად, იმ შემთხვევაში, თუ არ იარსებებს ხის მოჭრის შესაძლებლობა, ბიზნესი მნიშვნელოვნად შეფერხდება მსხვილი, ქვეყნისათვის სასიკეთო ეკონომიკური ეფექტის მქონე პროექტების განხორციელებაში და შეუძლებელი იქნება ტერიტორიის სამშენებლოდ განვითარება," - აღნიშნავდა კომპანია.

მოგვიანებით, კომპანიამ ინფორმაცია გაავრცელა, რომლითაც ირწმუნებოდა, რომ ჯანსაღი ხეების მოჭრას არ ითხოვდნენ.