პარლამენტის თავმჯდომარემ ირაკლი კობახიძემ, გადაცემა არჩევანში თავდაცვის ყოფილი მინისტრის თინა ხიდაშელის განცხადებას უპასუხა:

"თინა ხიდაშელის განცხადებების კომენტირება ჩემი საქმე არ არის, თუმცა იგი ერთმანეთისგან რომ ვერ არჩევს იურიდიულ და პოლიტიკურ განცხადებებს, ამის გამო მიიღო 1,5 პროცენტი ბოლო საპარლამენტო არჩევნებში. მე რა განცხადებაც გავაკეთე, ამას ჰქონდა პოლიტიკური კონტექსტი და ამას თუ ვერ არჩევს, დარჩება 1,5 პროცენტის ამარა".

ირაკლი კობახიძემ, დღესვე, რუსთავი 2-ის ეთერში, გადაცემა არჩევანში სტრასბურგის გადაწყვეტილება შეაფასა. მისი თქმით, დღემდე, ამ საქმეს ერქვა ხალვაში ყარამანაშვილის წინააღმდეგ, დღეს კი უკვე საქმეს ჰქვია, რუსთავი 2 საქართველოს წინააღმდეგ და მისივე თქმით, ამ დაპირისპირებაში გამარჯვებული გამოვა საქართველო.

ამ განცხადებას თინა ხიდაშელი საკუთარ ფეისბუქ გვერდზე გამოეხმაურა და პარლამენტის თავმჯდომარე გააკრიტიკა:

"ვინ ასწავლა, რომელ უნივერსიტეტში უთხრეს რომ სტრასბურგში საქმე ქვეყნის ინტერესების საწინააღმდეგოა? გირგვლიანმა რომ მოიგო საქმე სტრასბურგში, ალბათ მაშინაც ასე ფიქრობდა რომ ქვეყნის პრესტიჟი ზარალდებოდა და საქართველოს წინააღმდეგ მოქმედებდნენ მსხვერპლი და მისი ადვოკატები ".