ზაფხული ნაყინთან, გართობასთან და თამაშთან ასოცირდება, თუმცა დასვენებასთან ერთად წიგნების კითხვა, ახალი სამყაროების, პერსონაჟებისა და ფაქტების აღმოჩენაც მნიშვნელოვანია. თუ გინდა წიგნების კითხვა სასიამოვნო გამოცდილებად აქციო, შეგიძლია სულაკაურის გამომცემლობის საზაფხულო გამოწვევებში მეგობრებთან ერთად ჩაერთო.

კარგად მოკალათდი და გაეცანი 10 ლიტერატურული გამოწვევას, რომელიც შენს ზაფხულს უფრო საინტერესოს გახდის:

1. წაიკითხე წიგნი ცხოველების შესახებ

თუ ცხოველები გიყვარს, მაშინ წიგნში მათი თავგადასავლების, გრძნობებისა თუ განცდების ამოკითხვა განსაკუთრებით მოგეწონება. ოქროსფერი რეტრივერი კოსმო, მელაკუდა პაქსი, გოჭი უილბური და მისი მეგობრები შენს ზაფხულს ნამდვილად დაუვიწყარს გახდიან.

2. ძილის წინ თვითონ წაუკითხე დედას, მამას, ბებიას ან ბაბუას

ხმამაღლა კითხვა დაგეხმარება, უფრო საინტერესო და კარგი მთხრობელი გახდე და თან შენი საყვარელი წიგნები ოჯახის წევრებსაც გააცნო, რათა შემდეგ ისინი ერთად გაარჩიოთ. თუ დიდი და რთული სიტყვების გამოთქმა ცოტათი გიჭირს, ხმამაღლა კითხვით ამ პატარა დაბრკოლებასაც მარტივად გადალახავ!

3. წაიკითხე ავტორი შენნაირი ინიციალებით

წარმოიდგინე, რა სახალისო იქნება, შენსა და შენი წიგნის ავტორს რომ ერთნაირი ინიციალები გექნებათ! მაგალითად, თუ ელენე ბერიძე ან ერეკლე ბუკია ხარ, ძალიან გაგიმართლა, რადგან ქართულად ენიდ ბლაიტონის სამი სერიის წაკითხვა შეგიძლია! ვინ იცის, იქნებ ახალ სამყაროებში მოგზაურობა ისე მოგეწონოს, რომ მომავალში მწერალი თავადაც გახდე!

4. აღმოაჩინე შენი ინტერესები

გინდა საქართველოსა და მსოფლიოს ისტორიაზე, გეოგრაფიასა თუ კულტურაზე, ცხოველთა სამყაროსა თუ ადამიანებზე საინტერესო ამბები წაიკითხო და საოცარი ფაქტები აღმოაჩინო? მაშინ დროა, ენციკლოპედიას დაუმეგობრდე. უამრავ შთამბეჭდავ ფაქტს შორის შესაძლოა, შენი ახალი ინტერესიც აღმოაჩინო, რომელსაც სკოლაში დაბრუნებისას მეგობრებსაც გააცნობ.

5. წაიკითხე როალდ დალის რომელიმე წიგნი

როალდ დალის წიგნებში აღმოაჩენ კეთილ გოლიათ დიკეგოს, უნიჭიერეს მატილდას, რომელსაც წიგნების კითხვა უყვარს და ჩარლისთან ერთად შოკოლადის ქარხანაშიც კი იმოგზაურებ. მგონი, ამ მაცდუნებელი შემოთავაზების ხელიდან გაშვება არ ღირს!

6. წაიკითხე წიგნი, რომელსაც ერთსიტყვიანი სათაური აქვს

ერთსიტყვიანი სათაურით წიგნის შესახებ ბევრ რამეს ვერ გაიგებ, ხომ ასეა? სანამ წიგნს გადაშლი, სცადე და გამოიცანი, რის შესახებ იქნება ის. გამართლდება თუ არა შენი წინათგრძნობა?

7. დახატე საყვარელი პერსონაჟი

საყვარელ პერსონაჟებთან დასამეგობრებლად მათი დახატვა მშვენიერი ხერხია! კარლსონი, პატარა პრინცი და პეპი შენი წარმოსახვით შექმენი და ვინ იცის, იქნებ მალე სულ ახალი პერსონაჟიც კი შემოგეხატოს!

8. წაიკითხე წიგნი, რომელიც ხუთზე მეტი თავისგან შედგება და თან ილუსტრირებულია

სქელტანიანი წიგნები არც ისეთი საშიშია, როგორც გგონია, განსაკუთრებით მაშინ, როდესაც ახალი სამყაროს აღმოჩენა საოცარი ილუსტრაციების დახმარებით შეგიძლია! გადაშალე ქრის რიდელის რომელიმე წიგნი და ნახავ, რა მალე შემოგეკითხება!

9. წაიკითხე წიგნი ზაფხულის შესახებ

ნეტავ, როგორ ატარებენ ზაფხულს წიგნის პერსონაჟები? ამის გასაგებად ზაფხულის შესახებ წიგნის წაკითხვაზე უკეთესი გზა არ არსებობს! შეიძლება, წიგნის წაკითხვის შემდეგ საკუთარი ზაფხულის გასახალისებლად უამრავი იდეაც კი მოგივიდეს!

10. წაუკითხე შინაურ ცხოველს, თუ შინაური ცხოველი არ გყავს — ფუმფულა სათამაშოს

წიგნის კითხვა ყველაზე სახალისო მაშინაა, როცა მის შესახებ შეგიძლია, სხვებს მოუყვე. როდესაც შენს შინაურ ცხოველთან ან ფუმფულა სათამაშოსთან თამაშით დაიღლები, ერთად ყოფნის დრო წიგნის კითხვით გაიხანგრძლივეთ.

იმისათვის, რომ მიღწეული წარმატებების შესახებ სხვებსაც გააგებინო, მონიშნე შესრულებული პუნქტები ამ ფოტოზე, ატვირთე შენი ან მშობლის ანგარიშით ინსტაგრამის სთორიში და მონიშნე sulakauri_kids.