ციხის კადრების საქმეზე იუსტიციის ყოფილ მინისტრს, ზურაბ ადეიშვილს და სასჯელაღსრულების დეპარტამენტის ყოფილ ხელმძღვანელს, დავით ჭაკუას 4,5-წლიანი პატიმრობა მიუსაჯეს. მათ ასევე უნდა გადაიხადონ 5 000-5 000 ლარი ჯარიმა და 2 წლით და 3 თვით სახელმწიფო სამსახურში თანამდებობის დაკავება ეკრძალებათ. ამის შესახებ განცხადებას პროკურატურა ავრცელებს. ადეიშვილს ბრალი დაუსწრებლად წარედგინა.

განცხადებაში აღნიშნულია, რომ თბილისის საქალაქო სასამართლომ ისინი დამნაშავედ ე.წ. 2012 წლის ციხის კადრების საქმეზე, პროკურატურის მიერ წარდგენილი მტკიცებულებების საფუძველზე სცნო. კერძოდ, პატიმართა მიმართ დამამცირებელი და არაადამიანური მოპყრობის ორგანიზების, სამსახურებრივი უფლებამოსილების ბოროტად გამოყენების, სისხლის სამართლის საქმეზე მტკიცებულების ფალსიფიკაციის ორგანიზების, მოწმეზე ზემოქმედების და დანაშაულის პროვოკაციის ორგანიზების ფაქტზე.

პროკურატურის ინფორმაცია მტკიცებულებებზე

პროკურატურის ინფორმაციით, ციხის კადრებთან დაკავშირებით მოვლენები ასე ვითარდებოდა:

  • "2012 წლის სექტემბრის დასაწყისში ზურაბ ადეიშვილმა შეიტყო, რომ სასჯელაღსრულების დეპარტამენტის №8 დაწესებულებაში გადაღებული იყო პატიმრების ცემისა და წამების ამსახველი ვიდეომასალა, რომელიც შესაძლოა, გამოქვეყნებულიყო ევროპის რომელიმე ქვეყნის ტელევიზიით;
  • ამის გამო, მან 17 სექტემბერს მთავარი პროკურორის პირველი მოადგილე დ.ჩ. და სასჯელაღსრულების დეპარტამენტის თავმჯდომარე, დავით ჭაკუა დაიბარა;
  • თათბირზე გადაწყდა, რომ სასჯელაღსრულების №8 დაწესებულების 2 თანამშრომელს (მათი ვინაობა ინფორმაციაში მოცემულია ინიციალებით — ბ.ფ. და ლ.ფ., რომლებიც კავშირში იყვნენ ვ.ბ.-სთან) უნდა ეცემათ, დაემცირებინათ და შეურაცხყოფა მიეყენებინათ ამ დაწესებულების პატიმრებისთვის და ეს ყველაფერი გადაეღოთ ვიდეოზე;
  • ფალსიფიკაციის გზით მტკიცებულებები უნდა შეკრებილიყო ისე, რომ პატიმართა მიმართ ძალადობა დაბრალებოდა ქართული ოცნებას, რომელიც მაშინ მთავარ ოპოზიციურ ძალას წარმოადგენდა;
  • ამ შეხვედრის შემდეგ დავით ჭაკუამ №8 დაწესებულების უსაფრთხოების განყოფილების უფროსი ლ.ფ. იმავე დღეს დაიყოლია, რომ პატიმართა მიმართ ძალადობა ფარული ვიდეოკამერით გადაეღო;
  • პატიმართა მიმართ არაადამიანურ მოპყრობაში მონაწილეობა უნდა მიეღოთ ამავე დაწესებულების ზემოთ ნახსენებ თანამშრომლებს. ციხის უსაფრთხოების უფროსს კი საჯაროდ უნდა გაევრცელებინა ცრუ ინფორმაცია, თითქოს ოპოზიციური პარტიის წარმომადგენლებმა ვ.ბ.-ს მეშვეობით, გარკვეული თანხის სანაცვლოდ შეუკვეთეს ციხეში პატიმრების წამება;
  • ამავე დღეს დავით ჭაკუამ, მტკიცებულებების ფალსიფიკაციის მიზნით, იძულებით, შანტაჟისა და მუქარის გზით დაიყოლია ყოფილი პატიმარი და ვ.ბ.-სთან დაახლოებული პირი ნ.მ. ცრუ ჩვენების მიცემაზე — თითქოს, ქართული ოცნებისგან, გარკვეული თანხის მიღების სანაცვლოდ ვ.ბ. საპყრობილეებში პატიმართა ცემისა და წამების ამსახველი კადრების გამოქვეყნებას გეგმავდა;
  • მეორე დღეს, 18 სექტემბერს, ზემოთ ნახსენებმა პირებმა ეს დავალება შეასრულეს — №8 დაწესებულების №37-ე საკანში გააშიშვლეს პატიმრები რ.გ. და ე.წ., დააჩოქეს მუხლებზე და მიაყენეს სიტყვიერი და ფიზიკური შეურაცხყოფა;
  • იმავე დილით ლ.ფ.-მ საზოგადოებას, შსს-ს საზოგადოებასთან ურთიერთობის დეპარტამენტის მეშვეობით, მიაწოდა ცრუ ინფორმაცია, თითქოს, პატიმართა ცემა და შეურაცხყოფა მოხდა ქართული ოცნების წარმომადგენლების შეკვეთით;
  • მტკიცებულებების ფალსიფიკაციის მიზნით ლ.ფ.-ს სამუშაო ოთახში შეიტანეს და წინასწარ საგანგებოდ მომზადებულ სეიფში მოათავსეს 14 100 აშშ დოლარი, მაისური მასზე დამონტაჟებული ვიდეოკამერით და ლაზერული დისკი, სადაც ასახული იყო №37 საკანში განხორციელებული ძალადობა.

სასამართლოს გადაწყვეტილება

სასამართლომ 2021 წლის 6 ივლისს, პროკურატურის მასალაზე დაყრდნობით, შემდეგი განაჩენი გამოტანა:

  • ზურაბ ადეიშვილი დაუსწრებლად დამნაშავედ იქნა ცნობილი სისხლის სამართლის კოდექსის 25-332-ე მუხლის მეორე ნაწილით და მესამე ნაწილის „ბ“ და „გ“ ქვეპუნქტებით, 25-1443 მუხლის მეორე ნაწილის "ა", "ბ", "დ", "ე", "ზ" და "თ" ქვეპუნქტებით, 25-3691 მუხლის მესამე ნაწილით და 25-145-ე მუხლით გათვალისწინებული დანაშაულის ჩადენაში;
  • მას საბოლოო სასჯელის სახედ და ზომად, ამნისტიის კანონის გათვალისწინებით, 4 წლით და 6 თვით თავისუფლების აღკვეთა მიესაჯა, ამასთან, ჯარიმა 5 000 ლარის ოდენობით და 2 წლით და 3 თვით ჩამოერთვა სახელმწიფო სამსახურში დანიშვნითი თანამდებობის დაკავების უფლება;
  • დავით ჭაკუა დამნაშავედ იქნა ცნობილი სისხლის სამართლის კოდექსის 332-ე მუხლის მესამე ნაწილის „ბ“ და „გ“ ქვეპუნქტებით, 25-1443 მუხლის მეორე ნაწილის "ა", "ბ", "დ", "ე", "ზ" და "თ" ქვეპუნქტებით, 3691 მუხლის მესამე ნაწილით, 372-ე მუხლის მეორე ნაწილით და 25-145-ე მუხლით გათვალისწინებული დანაშაულის ჩადენაში;
  • მას საბოლოო სასჯელის სახედ და ზომად, 2012 წლის 28 დეკემბერს ამნისტიის შესახებ საქართველოს კანონის გამოყენების შემდგომ, განესაზღვრა 4 წლით და 6 თვით თავისუფლების აღკვეთა, ჯარიმა 5 000 ლარის ოდენობით და 2 წლით და 3 თვით ჩამოერთვა სახელმწიფო სამსახურში დანიშვნითი თანამდებობის დაკავების უფლება.

იუსტიციის ყოფილმა მინისტრმა და ყოფილმა გენერალურმა პროკურორმა, ზურაბ ადეიშვილმა, საქართველო 2012 წლის საპარლამენტო არჩევნების შემდეგ დატოვა. 2021 წლის აპრილში მან საქართველოს მოქალაქეობის დატოვება მოითხოვა, რაც მაისში დაკმაყოფილდა. დავით ჭაკუა კი 2020 წელს გერმანიამ საქართველოს გადმოსცა. ორივე მათგანი სხვა საქმეებზეც არის გასამართლებული.

გაიგე მეტი: