ტელეკომპანია რუსთავი 2-ის ახალი მფლობელი ქიბარ ხალვაში ამბობს, რომ არხი არ გააგრძელებს იმ ფუნქციის შესრულებას, რაც დღეს აქვს. ამის შესახებ მან ტვ პირველზე განაცხადა.

„არ იქნება ვიღაცის მოსამსახურე და აგიტატორი. ჩემს ხელში შეასრულებს ხალხის სამსახურში ყოფნის ფუნქციას. მე გაცილებით ნაკლებად ვარ დამოკიდებული [ბიძინა] ივანიშვილზე ან ოცნებაზე, ვიდრე [ნიკა] გვარამიაა დამოკიდებული [მიხეილ] სააკაშვილზე ან ნაციონალურ მოძრაობაზე. ასე, რომ ეს არ იქნება პარტიული ტელევიზია,“ - აღნიშნა ხალვაშმა, რომელიც ამბობს, რომ "წარსულში დაშვებულ შეცდომებს" არ გაიმეორებს.

ჟურნალისტ ნინო ჟიჟილაშვილის კითხვაზე, რომელიც ბიძინა ივანიშვილს უკავშირდებოდა: "თუ შესთავაზებენ ისეთ თანხას, რომელიც გეღირებათ, იქნებით თუ არა თანახმა?" - ხალვაშმა ასე უპასხა: "ყველაფერი ფული არ არის. ყველაზე მდიდარი ადამიანები ცნობილები არიან რომ ყველაზე მეტს არ იხდიან. ეს არ შეიძლება ყველაზე კარგი მყიდველი იყოს. ეს გამორიცხულია და არავითარი პრიორიტეტი და მასეთი განზრახვა არ არსებობს."

მანამდე კი თქვა, რომ ის არ აპირებს ტელეკომპანიის მფლობელი "სამუდამოდ" იყოს.