საქართველოს სახალხო დამცველმა, უჩა ნანუაშვილმა საქართველოს იუსტიციის მინისტრის, თეა წულუკიანის განცხადებას, შინაგან საქმეთა ყოფილი მინისტრის, ვანო მერაბიშვილის სასარგებლოდ ჩვენების მიცემის შესახებ, უპასუხისმგებლო უწოდა. ნანუაშვილის თქმით, წულუკიანმა დაამახინჯა რეალური სურათი და საზოგადოება შეცდომაში შეიყვანა.

"სავარაუდოა, რომ ქალბატონ მინისტრს სურს საკუთარი შეცდომა და პროცესის არასწორი წარმართვა სხვას გადააბრალოს. საქართველოს მთავარ პროკურატურას სახალხო დამცველის რეკომენდაცია ჯერ კიდევ 2013-2014 წლებში რომ გაეთვალისწინებინა, შესაძლებელი იყო, არც ევროსასამართლოში წაეგო ჩვენს ქვეყანას საქმე და არც დიდ პალატაში გასაჩივრების საჭიროება დამდგარიყო," - აღნიშნავს სახალხო დამცველი.

მისი თქმით, მან ევროსასამართლოს მიაწოდა მის ხელთ არსებული ინფორმაცია, როგორც პირმა, რომელიც პირადად შეხვდა მერაბიშვილს ციხეში და მოისმინა პატიმრის მონაყოლი.

"უაღრესად მნიშვნელოვანია ამ საქმეზე ობიექტური ჭეშმარიტების დადგენა და ამაში გამოძიებას ყველა მხარე უნდა დაეხმაროს. სახალხო დამცველის მოვალეობაა, დაიცვას ადამიანთა უფლებები მიუხედავად მათი პოლიტიკური კუთვნილებისა. ეს არ არის პოლიტიკოსების მხრიდან კრიტიკული განცხადების პირველი შემთხვევა სახალხო დამცველის მისამართით. მსგავსი ტიპის განცხადებები ახდენს სახალხო დამცველის ინსტიტუტის დისკრედიტაციას, თუმცაღა, ასეთი დამოკიდებულება სახალხო დამცველზე ვერ მოახდენს გავლენას, აპარატი აგრძელებს მანდატის ფარგლებში საკუთარი ფუნქციების სრულფასოვნად შესრულებას," - დასძენს უჩა ნანუაშვილი.

საქართველოს იუსტიციის მინისტრი, თეა წულუკიანმა საზოგადოებრივი მაუწყებლის ეთერში განაცხადა, რომ სტრასბურგის ადამიანის უფლებების ევროპულ სასამართლოში საქართველოს ყოფილ პრემიერ-მინისტრსა და შინაგან საქმეთა მინისტრის, დაკავებულ ვანო მერაბიშვილის სასარგებლო ჩვენება საქართველოს სახალხო დამცველმა, უჩა ნანუაშვილმა მისცა. წულუკიანმა ამის შესახებ საზოგადოებრივი მაუწყებლის გადაცემა მთავარში ისაუბრა.