როგორც ჩანს, მისის მეიზელს ახალი გულთამპყრობელი გამოუჩნდა.

სერიალ This is Us-ის (ეს ჩვენ ვართ) ვარსკვლავი — მაილო ვენტიმილია ბოლო დროის კიდევ ერთ გახმაურებულ სატელევიზო შოუში The Marvelous Mrs. Maisel (საოცარი მისის მეიზელი) მიიღებს მონაწილეობას.

სულ ახლახან ოფიციალურად გახდა ცნობილი, რომ ეს 43 წლის ამერიკელი მსახიობი საოცარი მისის მეიზელის მეოთხე სეზონში შეასრულებს როლს. ჯერჯერობით მისი პერსონაჟის შესახებ კონკრეტული დეტალები უცნობია, თუმცა სანაცვლოდ გადასაღები მოედნიდან უკვე გავრცელდა პირველი დამაინტრიგებელი კადრები.

ფოტო: JOSE PEREZ/BAUER-GRIFFIN/GC IMAGES

ამჟამად ოფიციალურად დადასტურებული არ არის, თუ როდის გამოვა მეოთხე სეზონი, მაგრამ ვიცით, რომ გადაღებები წლის დასაწყისში დაიწყო და პრემიერასაც 2021 წლის ბოლომდე უნდა ველოდოთ.

საოცარი მისის მეიზელი 2017 წელს იხილა პირველად მაყურებელმა და მან მაშინვე მოიგო სერიალების უამრავი მოყვარულის გული: შოუმ სამი სეზონით უკვე ემის ოცი, ხოლო ოქროს გლობუსის სამი ჯილდო დაიმსახურა.

რაც შეეხება მაილო ვენტიმილიას მონაწილეობით გადაღებულ სერიალს ეს ჩვენ ვართ, რომელიც ასევე ბოლო დროის ერთ-ერთი ყველაზე ცნობილი სატელევიზიო შოუა, მეექვსე სეზონით დაემშვიდობება ერთგულ მაყურებელს 2022 წლის დასაწყისში.

თუმცა მანამდე მაილო ვენტიმილიას მისის მეიზელთან ერთად ვიხილავთ!