საქართველოს პრემიერმინისტრის, ირაკლი ღარიბაშვილის განცხადებით, პესიმისტური სცენარით, საქართველოს ეკონომიკის ზრდა წელს 7% იქნება და ოპტიმისტურით — 10%-ზე მეტი.

"მოგეხსენებათ, რომ უყურებთ ეკონომიკის ძალიან სწრაფ აღდგენას და ტრენდი, რაც მომდინარეობს, ის პოზიტიური სიგნალები და განწყობები, რომელიც წამოსულია ბიზნესიდან, ჩვენ გვაძლევს ძალიან ოპტიმისტურ საფუძველს, იმედს, რომ ძალიან სწრაფად ხდება უკვე ეკონომიკის აღდგენა. ლარი არის გამყარებული და ეს ტენდენცია გრძელდება, კიდევ უფრო გამყარებას ელოდებიან ჩვენი ექსპერტები.

ეს ყველაფერი გვქიმნის ძალიან პოზიტიურ განწყობას, რომ ჩვენი ეკონომიკა აღდგება ძალიან სწრაფად, უკვე დაიწყო ამის აღდგენა. 45% იყო ზრდა აპრილის თვეში, რომელიც იყო უპრეცედენტო და ძალიან უნიკალური შემთხვევა და ასევე, მაისში ველოდებით ჩვენ ზრდის ძალიან მაღალ შედეგს. შესაბამისად, წელს ჩვენი ეკონომიკის ზრდა იქნება 7%-ზე მეტი, ეს არის პესიმისტური სცენარით დათვლილი და ოპტიმისტურით, შეიძლება, 10%-ზე მეტი იყოს", — განაცხადა ღარიბაშვილმა.

9 ივნისს მსოფლიო ბანკმა ეკონომიკური ზრდის პროგნოზები განაახლა, რომლის მიხედვითაც, წელს საქართველოს ეკონომიკა 6%-ით გაიზრდება — აქამდე არსებული პროგნოზი 4,3% იყო.

როგორც ჩანს, მოლოდინების პოზიტიური მიმართულებით ცვლილება აპრილში საქართველოს ეკონომიკის 44,8%-იან ზრდას უკავშირდება. რაც შეეხება მომავალი წლების პროგნოზებს, როგორც 2022 წელს, ასევე 2023 წელსაც მსოფლიო ბანკი საქართველოს ეკონომიკის 5%-ით ზრდას ელოდება.

მსოფლიო ბანკის მიერ გავრცელებული რელიზის მიხედვით, სამხრეთ კავკასიაში 2021 წელს ეკონომიკა 3,6%-ით, ხოლო 2022 წელს 4,2%-ით გაიზრდება. თუმცა, იქვე აღნიშნულია, რომ ეკონომიკის ზრდა, უმთავრესად, პანდემიასთან დაკავშირებული შოკების აღმოფხვრაზე იქნება დამოკიდებული.