გირჩის ლიდერის, იაგო ხვიჩიას განცხადებით, ეროვნული ბანკი მოქალაქეებს აღარიბებს. ამის შესახებ მან საფინანსო საბიუჯეტო კომიტეტის სხდომაზე განაცხადა, სადაც ეროვნული ბანკის პრეზიდენტს, კობა გვენეტაძეს უსმენენ.

ხვიჩიამ სომხეთ-აზერბაიჯანის ომის ფონზე საქართველოში ინფლაციის ზრდაზე ისაუბრა. მან გვენეტაძეს ჰკითხა, რა შემთხვევაში გადადგებოდა და მიხვდებოდა, რომ "რას ვაკეთებ, რაღაც პრობლემები შემექმნება".

"წარმოიდგინეთ ასეთი სიტუაცია, რომ ასეთი უტიფრობით, სომხეთ-აზერბაიჯანის ომი თურმე გავლენას ახდენს საქართველოში ინფლაციაზე და არ ახდენს საკუთარ ქვეყნებში. ეს რომ მოგყავთ, ამაზე მეტი რა უნდა გააკეთოს ეროვნული ბანკის პრეზიდენტმა იმისთვის, რომ დღის წესრიგში დადგეს მისი გადადგომის საკითხი, ფიზიკურად თქვენი ზღვარი რა არის. კანონით ვერავინ ვერ გადაგაყენებთ, პარლამენტში არ არსებობს ამის რესურსები, პირობითად. მაგრამ ხომ არსებობს ადამიანური მორალი, თქვენი. რა უნდა მოხდეს, რომ თქვენ თვითონ მოგივიდეთ აზრად, რომ ასე სიარული ქუჩაში არ შეიძლება, ვიღაცა მიხვდება საბოლოო ჯამში, რას ვაკეთებ, ვერ გავივლი, რაღაც პრობლემები შემექმნება. თქვენი მორალური ზღვარი სად არის, როდის გადადგებით, რა უნდა დააშავოთ", — თქვა იაგო ხვიჩიამ.

ამ სიტყვებს ეროვნული ბანკის პრეზიდენტსა და დეპუტატს შორის მცირე შელაპარაკება მოყვა:

გვენეტაძე: რას ნიშნავს, პრობლემები შემექმნება?

ხვიჩია: აი, თქვენ ახლა ხომ დამალული ხართ?.. არ გიცნობენ...

გვენეტაძე: ანუ თქვენ რაღაცას მიწყობთ? თუ რაშია საქმე?

ხვიჩია: მე არაფერს არ გიწყობთ. მე არ მითქვამს...

გვენეტაძე: არა, დააკონკრეტეთ თუ შეიძლება...

ხვიჩია: კი, როგორ არა, დავაკონკრეტებ. იმიტომ რომ თქვენ კი არ გიწყობთ...

გვენეტაძე: ეს უნდა განვიხილოთ აუცილებლად. ე.ი. თქვენ მე მემუქრებით, რომ რაღაცას მომიწყობთ ქუჩაში, ხო?

ხვიჩია: დამამთავრებინეთ, თუ შეიძლება. იცოდეთ სადაც ხართ. მაგრამ ისე, ზოგადად, რომ გემუქრებით, ეგ ფაქტია, მაგრამ არა ისე, თქვენ როგორც გგონიათ.

გვენეტაძე: თქვენ თვით რომ რაღაცა მომიწყობთ...

ხვიჩია: ჩვენ გავაგებინებთ მთელ საზოგადოებას თქვენ ვინ ხართ, რა ჩაიდინეთ ზოგადად ამ ქვეყნის წინაშე, როგორ აღარიბებთ და აღატაკებთ ადამიანებს, რამდენი სიცოცხლეა თქვენს კისერზე. უბრალოდ ფულს ბეჭდავთ. ფულს ბეჭდავთ და მერე გაუფასურებას აბრალებთ შოკებსა და შოკუნიებს.