მუნიციპალური მუზეუმების გაერთიანების სტრუქტურული ერთეულის, ვახტანგ ჭაბუკიანის სახელობის მემორიალური ბინა-მუზეუმის განახლებული ექსპოზიცია თბილისის მერმა გახსნა. ექსპოზიცია სიმბოლურად, ვახტანგ ჭაბუკიანის 107-ე დაბადების დღეს მიეძღვნა.

მუზეუმი, რომელშიც 4565 ექსპონატია დაცული, ერთი თვის განმავლობაში დახურული იყო. შენობაში ჩატარდა სარემონტო სამუშაოები, განხორციელდა ექსპონატების აღწერა და რესტავრაცია, ასევე რეექსპოზიცია.

ღონისძიების ფარგლებში, პირველად გამოიფინა დიდი ქართველი ბალეტმაისტერის, ვახტანგ ჭაბუკიანის სასცენო კოსტიუმები ისეთი წარმატებული სპექტაკლებიდან, როგორებიცაა - „წითელი ყაყაჩო”, „ცეცხლის ცეკვა მაშხალებით”, „ოტელო”, „რაიმონდა”, „ლაურენსია”, „ტარას ბულბა”, „კორსარი”, „კარმენი”, „დონ-კიხოტი” და „ბაიადერა”.

ფოტო: თბილისის მერია

ფოტო: თბილისის მერია

ვახტანგ ჭაბუკიანი ქართველი მოცეკვავე, ბალეტმაისტერი, სსრკ სახალხო არტისტი და ქართული პროფესიული ბალეტის ფუძემდებელია.

ფოტო: თბილისის მერია

ფოტო: თბილისის მერია

ჭაბუკიანი საბალეტო ხელოვნების რეფორმატორად ითვლება. საბალეტო კლასიკასთან ქართული ხალხური ცეკვის შერწყმით მან შექმნა ეროვნული კლასიკური ბალეტის თავისებური სახეობა. განსაკუთრებული წარმატება ხვდა წილად ვახტანგ ჭაბუკიანის მიერ შესრულებულ ოტელოს პარტიას, სადაც ერთმანეთს შეერწყა მოქმედი ცეკვა და პანტომიმა.

ფოტო: თბილისის მერია

ვახტანგ ჭაბუკიანმა პირველი საკონცერტო ნომერი – „ცეცხლის ცეკვა“ 15 წლის ასაკში დადგა, საგმირო ხასიათის ცეკვებზე კი, პირველი განაცხადი ნომრით „ცეცხლის ცეკვა მაშხალებით“ გააკეთა, რომელიც 1929 წელს, ლენინგრადის ქორეოგრაფიული სასწავლებლის გამოსაშვები საღამოსთვის დადგა და შეასრულა.

ფოტო: თბილისის მერია