ისრაელში, ქალაქ ლოდში კომენდანტის საათი გამოცხადდა. ინფორმაციას ამის შესახებ საქართველოს საელჩო ისრაელში ავრცელებს და მოქალაქეებს სახლებში დარჩენისკენ მოუწოდებს.

"ლოდში 20:00 სააათიდან ცხადდება სრული ჩაკეტვა — კომენდანტის საათი. არ გახვიდეთ ქუჩაში. საჯარისო დანაყოფები გამოიყენებენ ყველაზე მკაცრ ზომებს", — წერია საელჩოს განცხადებაში.

საელჩო წერს, რომ 18:00 საათიდან, შესაძლოა, ისრაელის ცენტრის მიმართულებით მორიგი სარაკეტო შეტევები დაიწყოს. კერძოდ, მათი ინფორმციით, მოსალოდნელია, რომ თავდასხმები განხორციელდება შემდეგი მიმართულებით: აშკელონი; აშდოთი; ბეერ-შევა; შდეროთი, იავნე, გადერა, ხოლონი, ბათ იამი, რიშონ ლეციონი, თელ-ავივი, ბნეი ბრაკი, გივატაიმი, რამათ განი, რამათ ავივი, ლოდი, რამლე, ჰერცელია, კფარ შმარიაჰუ.

ინფორმაციას ისრელის მედიას ავრცელებს. Times of Israel-ის ცნობით, საღამოს 8 საათიდან ღამის 4 საათამდე გარეთ გასვლა იკრძალება. გამოცემა წერს, რომ სახლების დატოვება მხოლოდ თავშესაფარისკენ გადაადგილებისთვის ან სპეციალური საჭიროებისთვის იქნება შესაძლებელი.

10 მაისს იერუსალიმში დაპირისპირება გამწვავდა. რამდენიმე წლის შემდეგ პირველად, ჰამასმა იერუსალიმზე სარაკეტო თავდასხმა განახორციელა. საპასუხოდ, ისრაელმა ღაზის სექტორზე საჰაერო იერიში მიიტანა. 11 მაისს ღაზის სექტორმა დაბომბა თელ-ავივიც. სიტუაცია დაიძაბა ქალაქ ლოდშიც. მედიების ცნობით, გვიან ღამით დაიწვა სინაგოგები, მაღაზიები და ათეულობით მანქანა. მთავრობამ საგანგებო მდგომარეობა გამოაცხადა და სიტუაციის განსამუხტად ქალაქში სასაზღვრო პოლიცია გაიგზავნა.

ამავე თემაზე: