Galt & Taggart-ის შეფასებით, იანვარ-აპრილში უცხოური ტურიზმიდან საქართველოში შემოსული თანხები წლიურად 77,5%-ით შემცირდა და 98,3 მილიონი დოლარი შეადგინა. ამის შესახებ საკონსულტაციო კომპანიის მიერ გამოქვეყნებულ გასული კვირის მიმოხილვაშია ნათქვამი.

ანგარიშში ტურიზმის სტატისტიკის სხვა მონაცემებიც არის განხილული და აღნიშნულია, რომ 2021 წლის აპრილში საერთაშორისო ვიზიტები (ტურისტები და ერთდღიანი ვიზიტები) წლიურად, მნიშვნელოვნად, 140,4%-ით გაიზარდა და 82,5 ათასი ვიზიტი შეადგინა.

"ეს ზრდა იხსნება ტურისტების რაოდენობის ზრდით (+182,2% წ/წ) გასული წლის დაბალი ბაზიდან. ჯამურად, 2021 წლის პირველ 4 თვეში ქვეყანაში 212,7 ათასი (-81,6% წ/წ) საერთაშორისო ვიზიტი განხორციელდა, საიდანაც ტურისტულმა ვიზიტებმა 192,4 ათასი (-75,7% წ/წ) შეადგინა", — ნათქვამია Galt & Taggart-ის მიმოხილვაში.

აღსანიშნავია, რომ კორონავირუსით გამოწვეულმა პანდემიამ ტურიზმის ინდუსტრია მნიშვნელოვნად დააზარალა. 2020 წელს უცხოური ვიზიტების რაოდენობა წლიურად 80%-ით შემცირდა და 1,5 მილიონი შეადგინა. შესაბამისად, შემცირებულია ტურიზმიდან შემოსული თანხებიც — ეროვნული ბანკის გათვლებით, გასულ წელს ტურიზმის სექტორმა უცხოელი ვიზიტორებისგან 2,7 მილიარდით ნაკლები, 541,7 მილიონი დოლარის შემოსავალი მიიღო.

ცნობისთვის: Galt & Taggart საინვესტიციო ბანკია, რომელიც 20 წელია, ბაზარზე ფუნქციონირებს და როგორც ადგილობრივ, ისე საერთაშორისო მომხმარებლებს სთავაზობს ყველა ტიპის საინვესტიციო მომსახურებას: საბროკერო და კვლევით მიმართულებებს, საინვესტიციო ბანკინგს, აქტივებისა და ქონების მენეჯმენტს.