საქართველოს მართლმადიდებელი ეკლესიის წმინდა სინოდის წევრები და სხვა სასულიერო პირების ბრიუსელში უკვე რამდენიმე დღეა სამუშაო ვიზიტით იმყოფებიან.

საინფორმაციო ცენტრი ნატოსა და ევროკავშირის შესახებ ავრცელებს ინფორმაციას, რომ სასულიერო პირებმა 22 თებერვალს შეხვედრები გამართეს ნატოს სათაო ოფისში. ეპარქიის მმართველი მღვდელმთავრები უკვე შეხვდნენ ნატოს გენერალური მდივნის სპეციალური წარმომადგენელს კავკასიასა და ცენტრალურ აზიაში ჯეიმს აპატურაის. შეხვედრაზე საქართველოს ევროატლანტიკურ სტრუქტურებში ინტეგრაციასა და საზოგადოების ამ პროცესის შესახებ ინფორმირების კუთხით საქართველოს მართლმადიდებელი ეკლესიის ჩართულობის მნიშვნელობაზე იმსჯელეს.

“ნება ქართველი ერის ყოველთვის ევროპისკენ სწრაფვა იყო. დაცულობა იმ რეგიონში, სადაც რუსეთმა არაერთხელ მოახდინა აგრესია და ჩვენი ტერიტორიების ნაწილი ოკუპირებულია, ჩვენი ხედვაა, რომ ჩვენი დაცულობა, უსაფრთხოების მხრივ, ევროატლანტიკურ სტრუქტურებში გაერთიანებაა. ის მითები, რომლებიც არსებობს ნატოს შესახებ უნდა დაინგრეს", - განაცხადა ჩრდილოეთ ამერიკის ეპისკოპოსმა საბამ.

ბელგიაში ვიზიტი ვანისა და ბაღდათის მიტროპოლიტმა ანტონმაც შეაფასა:

“ჩვენ აქ ყველანაირად მიღებული ვართ ისევე, როგორც ჩვენ, მათაც ემსხვრევათ არსებული სტერეოტიპები, აინტერესებთ ვინ ვართ, რა ხალხი ვართ. ჩვენც გვაინტერესებს სად შევდივართ და რა ფასეულობებია იქ. ჩვენი ვიზიტი და ჩვენი წარმომადგენლობა სწორედ ამას ემსახურება".

ნატოში შეხვედრები მთელი დღის განმავლობაში გრძელდებოდა.