ლელოს ერთ-ერთი ლიდერის, ბადრი ჯაფარიძის განცხადებით, ოპოზიცია ვერ გაითხოვს ამნისტიას. აღნიშნული ჯაფარიძემ მელიას განცხადებასთან დაკავშირებით თქვა.

"ოპოზიცია ვერ გაითხოვს ამნისტიას, ეს არის შარლ მიშელის დოკუმენტი, ჩვენ არ შეგვიძლია შარლ მიშელის დოკუმენტის გათხოვა. ეს არის ბატონი მელიას პოზიცია, რომელიც ალბათ, მედიატორმა უნდა განიხილოს. დაველოდოთ. კიდევ ერთხელ მინდა ხაზი გავუსვა, რომ ამნისტიის კანონი ვერცერთ შემთხვევაში ვერ შეეხება ჯალათებს. არავის ასეთი განზრახვა არ აქვს. თუ იქნება მცდელობა, რომ ისეთი ფორმულირება იქნეს შეთავაზებული ქართული ოცნების მიერ, რომელიც დატოვებს კარს ღიას ჯალათების შესაძლოა ამნისტირებაზე, ჩვენ ასეთ კანონპროექტს მხარს არ დავუჭერთ, ეს არის გამორიცხული. ჩვენ წინააღმდეგი არ ვიქნებით, ჩვენ მხარს დავუჭერთ ნიკა მელიას ამ წინადადებას, რადგან ჩვენი ამოცანა საბოლოო ჯამში არის, შეთანხმების ერთ-ერთი მნიშვნელოვანი ფაქტორი იყო ორი პოლიტპატიმრის გათავისუფლება, ერთი უნდა გათავისუფლდეს ხვალ, როცა შევალთ პარლამენტში, მეორე პოლიტპატიმრის ნება ჩვენთვის არის ძალიან მნიშვნელოვანი, თუ ის ამბობს, რომ მზად არის გირავნობას დაეთანხმოს ევროკავშირიდან, ოღონდ მოითხოვს ამნისტიის შესახებ კანონის ამოღებას და ამას გაიზიარებს მედიატორი, ჩვენ ამას მხარს დავუჭერთ", — განაცხადა ჯაფარიძემ.

ნაციონალური მოძრაობის თავმჯდომარემ, ნიკა მელიამ განაცხადა, რომ ის მზადაა ევროკავშირის მიერ შემოთავაზებულ გირაოს დათანხმდეს და ისე დატოვოს საპატიმრო, თუ ამნისტიის კანონპროექტს გაითხოვენ. ნიკა მელია ამბობს, რომ ქართული ოცნება ამნისტიას ყველაზე გაავრცელებს და ოპოზიციას მოუწოდებს, ამ პროცესებში მონაწილეობა არ მიიღონ.