საქართველოს სახალხო დამცველმა, უჩა ნანუაშვილმა საქართველოს პატრიარქი, ილია მეორე მოინახულა. შეხვედრის შემდეგ ნანუაშვილმა განაცხადა, რომ ილია მეორესთან დეკანოზ გიორგი მამალაძის საქმესთან დაკავშირებით ზოგადად ისაუბრა.

როგორც ნანუაშვილმა თქვა, რაღაც საკითხებზე პატრიარქს ჰქონდა ინფორმაცია, თუმცა არადეტალური.

"ის გარკვეულწილად არის ინფორმირებული, თუმცა, ჩვენ ძალიან ზოგადი საუბარი გვქონდა და უახლოესი დღეების განმავლობაში უფრო მეტ ინფორმაციას მიაწვდის საზოგადოებას. საუბარი ზოგადი იყო, შესაბამისად, ჩვენ ყველა ველოდებით და მან აღნიშნა - უნდა გაკეთდეს ყველაფერი, რომ ტემპერატურამ დაიწიოს და საზოგადოება დაწყნარდეს, გაერკვეს, თუ რა მოხდა სინამდვილეში”, - თქვა სახალხო დამცველმა.

ილია მეორე გერმანიიდან საქართველოში რამდენიმე საათის წინ დაბრუნდა. დაბრუნების შემდეგ მან განაცხადა, რომ დეკანოზ გიორგი მამალაძის საკითხს ხელისუფლებასთან ერთად შეისწავლიან და შემდეგ "გამოიტანენ დასკვნას".