ტელეკომპანია რუსთავი 2-ის გენერალური დირექტორი, ნიკა გვარამია მიიჩნევს, რომ დეკანოზი გიორგი მამალაძის ადვოკატები, დუმილით, საკუთარი დაცვის ქვეშ მყოფი პირის უფლებებს უხეშად არღვევენ. ის მზადაა უსასყიდლოდ დაიცვას დეკანოზის უფლებები. ამის შესახებ გვარამიამ ფეისბუკში დაწერა.

გვარამიას მიაჩნია, რომ დოკუმენტი, რომელზეც დეკანოზის ადვოკატებმა საქმესთან დაკავშირებით დუმილის პირობა დადეს კონსტიტუციით დაცულ უფლებას - თანასწორობას - არღვევს.

"დეკანოზის ოჯახს მივმართავ - მე ვარ ადვოკატთა ასოციაციის წევრი საერთო (ანუ, მათ შორის, სისხლის სამართლის) სპეციალიზაციით. მზად ვარ უსასყიდლოდ დავიცვა დეკანოზის უფლებები და უკანონო გაფრთხილებების მიუხედავად, საკუთარი რისკითა და პასუხისმგებლობით, გავასაჯაროო ნებისმიერი ინფორმაცია, რომელზეც ლეგიტიმური საჯარო ინტერესია და რომლის გასაჯაროებაც დეკანოზის ინტერესებშია," - წერს გვარამია ფეისბუკში.

დეკანოზი გიორგი მამალაძე რამდენიმე დღის წინ დააკავეს. მისი ადვოკატები საქმესთან დაკავშირებით პროკურატურისთვის მიცემული გაუთქმელობის პირობის გამო ვერ საუბრობენ.