9 აპრილის ტრაგედიიდან 32 და დამოუკიდებლობის აქტის მიღებიდან 30 წლისთავზე მომღერალმა გია გაჩეჩილაძემ, იგივე უცნობმა საპროტესტო აქცია-მსვლელობა გამართა.

მისი მხარდამჭერების შეკრება თბილისში, ევროპის მოედანზე 13:00 საათზე დაიწყო. უცნობმა მათ სიტყვით მიმართა, რომელიც გაჯერებული იყო ოპოზიციის კრიტიკითა და საპატრიარქოს მიმართ მადლიერებით. გაჩეჩილაძე ამტკიცებს, რომ იქ შეკრებილები "ინტელექტუალური პროტესტის" მომხრეები არიან.

"ძალიან უნდათ და გვიწვევენ, რომ რაღაცნაირად რუსთაველზე მოხდეს იმ კარვების აყრა, იმ სუნიანი და გაბინძურებული კარვების აყრა. ყველამ დაინახა, ვის უყვარს საქართველო და ვის არა. ელემენტარულად, ერთი დღით არ აალაგეს კარვები, რომ ხალხი მისულიყო და პატივი მიეგო, მაგრამ არაუშავს. ჩვენ მათ მოედანზე არ ვითამაშებთ, კარგად გაიგონ, რომ ჩვენ ვართ ინტელექტუალური პროტესტის მომხრე და დავრჩებით ასე ყოველთვის", — განაცხადა გია გაჩეჩილაძემ.

"ინტელექტუალური პროტესტის" ორგანიზატორმა ამ სიტყვებიდან რამდენიმე წუთში ევროპის მოედანზე მდებარე ბერლინის კედლის ფრაგმენტი დააზიანა — მან ძეგლზე გააკეთა წარწერა: "ღმერთი სიყვარულია". საპასუხოდ, მერიამ მისი დაჯარიმება დააანონსა — მომღერალს, სავარაუდოდ, 1 000 ლარის გადახდა მოუწევს.

ფოტო: გვანცა სეთურიძე/On.ge

უცნობის განცხადებების შემდეგ, შეკრებილები მსვლელობით საპატრიარქოსკენ გამემართნენ. მათ მართლმადიდებელ ეკლესიას მადლობა გადაუხადეს, საპასუხოდ კი, სასულიერო პირებმა შენობის აივნიდან აკურთხეს. მეტიც, აქცია საპატრიარქოს საზოგადოებასთან ურთიერთობის სამსახურმა Facebook Live-ითაც გააშუქა.

აქცია "გამორჩეული" იყო იმითაც, რომ განსაკუთრებული აგრესია იგრძნობოდა ჟურნალისტების მიმართ. შეკრებილები კომენტარზე, მეტწილად, უარს აცხადებდნენ და ჟურნალისტებს შეურაცხყოფას აყენებდნენ, მედიას მუშაობაში ხელი ეშლებოდა.

გვიჭირს, დავასახელოთ ერთი კონკრეტული მოთხოვნა ან მესიჯი, რომელიც ამ აქციას ჰქონდა, რადგან შეკრებილებისგან ისმოდა განსხვავებული განცხადებები — ზოგი ოპოზიციის კრიტიკით იყო დაკავებული, ზოგი კი — საპატრიარქოსადმი მადლიერების გამოხატვით.

საპატრიარქოდან მსვლელობა დედაენის ბაღისკენ გაემართა, სადაც უცნობმა ახალი საზოგადოებრივი ძალის შექმნა დააანონსა, რომელიც, მისი თქმით, "სამოქალაქო კონტროლის ფუნქციას იტვირთავს და ქვეყნის ცივილიზებული განვითარების არჩევანიდან გადახვევას არ დაუშვებს". შეკრებილებმა ხელი მოაწერეს ბანერზე, სახელწოდებით "საქართველოს და ქართველი ხალხის მარადისობის დღის დაფუძნების დოკუმენტს".