ქართული ოცნების დეპუტატის, ირაკლი ქადაგიშვილის თქმით, მათ, ვინც ქართული ოცნების ოფისთან სტიკერები გააკრეს, არ უნდა ეწყინოთ თუ მათ ოფისთანაც მიაკრავს ვინმე სტიკერს.

"როდესაც მოვლენ თქვენს ოფისთან, შეურაცხმყოფელ პლაკატებს გაგიკრავენ და შეძახილებს გააკეთებენ, ბუნებრივია, რომ ვიღაც მივა და ანალოგიურ, ოღონდ მათი ისტორიისთვის დამახასიათებელ პლაკატს მიაკრავს მათ ოფისს, ამიტომ ნუ ეწყინებათ, თუ მათი ისტორიის გამახსენებელ პლაკატს მიუკრავს ვიღაც მათ ოფისს. დეპუტატები უხდიან იქეთ მხრიდანაც მადლობას და აქეზებენ", — განაცხადა ქადაგიშვილმა.

4 აპრილს ბათუმში ქართული ოცნების მხარდამჭერები ოპოზიციური პარტიების ოფისებთან ცოცხებით მივიდნენ. აღნიშნულ ცოცხებზე სხვადასხვა პარტიის ლიდერის ფოტო იყო გამოსახული.

როგორც გამოცემა ბათუმელები წერს, აქციის მონაწილეები ჯერ ევროპული საქართველოს ოფისთან, შემდეგ კი ნაციონალურ მოძრაობასთან გადაინაცვლეს. მათ ოფისების ფანჯრებსა და კარებზე სტიკერები გააკრეს.

აქციის ერთ-ერთი მონაწილის თქმით, წინა დღეს ოპოზიციის მხარდამჭერებმა იგივე გააკეთეს და სტიკერები გააკრეს ქართული ოცნების ოფისთან, რაც მათთვის მიუღებელია.

მმართველი გუნდის მხარდამჭერებმა სტიკერები გააკრეს მოძრაობა სირცხვილიას ბათუმის ოფისის კარებზეც.