გირჩი — მეტი თავისუფლების ლიდერის, ზურაბ ჯაფარიძის განცხადებით, მოლაპარაკებებზე ქართული ოცნების წარმომადგენლები კრისტიან დანიელსონის შეკითხვებს "გაურბოდნენ", რაზეც მას ბოლოს "ამოასხა" და მოუწოდა მმართველი გუნდის ლიდერებს მედიატორის კითხვებზე პასუხი გაეცა, რაზეც ისინი გაღიზიანდნენ. ასე ხსნის ის მმართველი პარტიის თავმჯდომარის, ირაკლი კობახიძის განცხადებას, სადაც მან გირჩი — მეტი თავისუფლება "რადიკალურ პარტიად" მოიხსენია.

"რაც შეეხება, მე რატომ მოვხვდი რადიკალბეში, ეს გამოიწვია იმან, რომ იმის გამო, რომ დანიელსონმა რამდენჯერმე დაუსვა ერთი და იგივე შეკითხვა, ამ ორ პუნქტს რომ დავანებოთ თავი, იმ სამ პუნქტზე ხართ თუ არა თანახმა ხელი მოაწეროთო, ისინი რამდენჯერმე გაექცნენ პასუხს, პირდაპირ პასუხს არ იძლეოდნენ და რაღაც მომენტში, მე ამომსახასავით, ოღონდ არაფერი უზრდელური არ მითქვამს. უბრალოდ მოვუწდე, რომ იქნებ უპასუხო მედიატორის დასმულ კითხვას-მეთქი, რაზეც გაღიზიანდა და შემდეგ ეს გაღიზიანება გარეთ, ამ ბრიფინგზე გადათარგმნა იმაში, რაც მოისმინა ყველამ", — თქვა მან.

მხარეებს შორის გამართული შეხვედრის დასრულების შემდეგ, კობახიძემ განაცხადა, რომ მოლაპარაკებებზე "რადიკალურ პარტიებს" შორის იყო გირჩი — მეტი თავისუფლებაც, რომელსაც, მისი თქმით, "არაფერი სცხია თავისუფლების".

ქართული ოცნება და ოპოზიცია ისევ ვერ შეთანხმდნენ. მათ ევროპული საბჭოს პრეზიდენტის შარლ მიშელის წარმომადგენლის, კრისტიან დანიელსონის მიერ შეთავაზებულ დოკუმენტს ხელი არ მოაწერეს. შეხვედრის შემდეგ მხარეებმა ისაუბრეს, რომ იყო საკითხები, რაზეც თანხმდებოდნენ, მაგრამ ნაწილზე — ვერა. მაგალითად, ლელოს ლიდერმა, ბადრი ჯაფარიძემ განაცხადა, რომ ნაციონალური მოძრაობის ლიდერ ნიკა მელიასთან დაკავშირებით შემოთავაზებული იქნა გადაწყვეტილება, რომელიც სრულად პასუხობდა პრობლემის გადაჭრას, თუმცა ეს არ განმეორდა გიორგი რურუას შემთხვევაში.

დანიელსონი მხარეებთან შეხვედრამდე საქართველოს პრეზიდენტს, სალომე ზურაბიშვილს შეხვდა თუმცა შეხვედრის შესახებ პრეზიდენტის ადმინისტრაციას წინასწარ ინფორმაცია არ გაუვრცელებია. ამასთან, შეხვედრის დასრულების შემდეგ, მათ არ გაავრცელეს არც ფოტოები და არც ვიდეო. მიშელის წარმომადგენელი საქართველოში მეორედ 27 მარტს ჩამოვიდა. ის 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს, ხოლო 29 მარტს პოლიტიკურ პარტიებს ინდივიდუალურ ფორმატში შეხვდა.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.