პარლამენტის პირველი ვიცე-სპიკერი ამბობს, რომ ევროპარლამენტარი ანდრიუს კუბილიუსის განცხადება არაფორმალურ ლიდერებთან დაკავშირებით არაპროფესიონალური და ქართული საზოგადოების შეურაცხმყოფელია.

ევროპარლამენტარი ანდრიუს კუბილიუსი ქართულ ოცნებასა და ოპოზიციას შორის მოლაპარაკების პროცესში არაფორმალური ლიდერების ჩართვის იდეით 25 მარტს გამოვიდა.

"მისი განცხადებები ერთი მხრივ არის არაპროფესიონალიზმის აპოგეა და მეორე მხრივ არის მავნებლობა, რითაც შეიძლება განპირობებული იყოს ტოლობის ნიშნის დასმა სააკაშვილსა და ბიძინა ივანიშვილს შორის. და მეორე, დანაშაულებების თითქოსდა უგულებელყოფა, რომელიც ჩადენილ იქნა რეალობაში. ზოგადად, ქართული საზოგადოების შეურაცხყოფაა ის განცხადება, რაც გააკეთა კუბილიუსმა", — განაცხადა ვოლსკიმ.

ევროპარლამენტარის განცხადებას გამოეხმაურა ქართული ონების თავმჯდომარე, ირაკლი კობახიძეც. მისი თქმით, ივანიშვილსა და სააკაშვილს შორის ტოლობის ნიშნის დასმა "შეურაცხმყოფელია".

ევროპარლამენტარმა ანდიურს კუბილიუსმა ფორმულასთან ინტერვიუს დროს აღნიშნა, რომ პრობლემის მოგვარებისთვის უფრო ეფექტური იქნება, თუ ევროპული საბჭოს პრეზიდენტის წარმომადგენელი, კრისტიან დანიელსონი დაელაპარაკება რეალურ ლიდერებს, რომლებიც დღემდე მოლაპარაკებებში არ მონაწილეობენ. იგი ექს-პრეზიდენტ მიხეილ სააკაშვილსა და ქართული ოცნების ყოფილ თავმჯდომარეს, ბიძინა ივანიშვილს გულისხმობდა.