საქართველოს კომუნიკაციების ეროვნული კომისიის ხუთმა წევრმა 2016 წელს 1 183 724 ლარი გამოიმუშავა. ამ თანხის 81 პროცენტი, 960 060 ლარი, თანამდებობრივი სარგოა, დარჩენილი 223 664 ლარი კი - პრემია.

კომისიის წევრებს შორის გასულ წელს ყველაზე მეტი ანაზღაურება, 246 272 ლარი, თავმჯდომარემ, ვახტანგ აბაშიძემ აიღო, ყველაზე ნაკლები, 233 988 ლარი, კი - კახი ბექაურმა. ბექაურის ანაზღაურება დანარჩენი სამი წევრის - ელისო ასანიძის, გიორგი ფრუიძე და მერაბ ქათამაძის შემოსავალს 500 ლარით ჩამორჩება.

2015 წლის 31 დეკემბრის მონაცემებით, კომისიაში 133 თანამშრომელი მუშაობდა, 2016 წლის 30 დეკემბრს კი - 113. გასულ წელს კომისიის თანამშრომლებმა (კომისიის წევრების გარდა) ჯამში 5 321 419 ლარი გამოიმუშავეს, საიდანაც 1 082 136 ლარი პრემიაა. კომისიის თანამშრომლებს დანამატი არ მიუღიათ.

2012-2016 წლებში კომისიის თანამშრომლების ანაზღაურება ჯამში 33 მილიონ ლარზე მეტი იყო. 2012 წლიდან 2014 წლის ჩათვლით კომისიის ხელფასი და პრემია იზრდებოდა, 2015 წელს ხელფასი გაიზარდა და პრემია შემცირდა, შარშან კი - წინა წელთან შედარებით ხელფასიც და პრემიაც შემცირდა.

ფოტო: infogr.am

საქართველოს კომუნიკაციების ეროვნული კომისია საქართველოს სახელმწიფო ბიუჯეტიდან არ ფინანსდება. მისი შემოსავლის ძირითადი წყარო ელექტრონული კომუნიკაციებისა და მაუწყებლობის სფეროში ავტორიზებული/ლიცენზირებული პირების მიერ გადახდილი რეგულირების საფასურია.