ევროკავშირის ელჩის საქართველოში, კარლ ჰარცელის განცხადებით, საიდუმლო არ არის, რომ მედიაციის პირველი რაუნდი იმედგამაცრუებელი იყო. ამის შესახებ მან ჟურნალისტებთან ისაუბრა.

"მოგეხსენებათ, რამდენიმე დღის წინ პრეზიდენტმა მიშელმა მისი წარმომადგენლის, დანიელსონის მიერ ჩატარებული პირველი სამედიაციო მოლაპარაკებების შემდეგ, განაცხადა, რომ ისურვებდა მისი წარმომადგენლის დაბრუნებას. სწორედ მისი ჩამოსვლის მზადების პროცესში ვართ.

ვფიქრობ, საიდუმლო არაა ის ფაქტი, რომ პირველი რაუნდი მედიაციის იმედგამაცრუებელი იყო იმ მხრივ, რომ ვერ მოხერხდა იმ შეთანხმების მიღწევა, რასაც ასე მნიშვნელოვნად მივიჩნევთ ევროკავშირში. რათა საქართველომ შეძლოს წინსვლა, ახლა არის ის ჭეშმარიტების მომენტი. დანიელსონი ჩამოვა, რათა ნახოს, არსებობს თუ არა კიდევ იმის შესაძლებლობა, მხარეებმა საერთო ნიადაგი გამონახონ. ახლა დროა, ყველა მხარე საწყის პოზიციებზე სერიოზულად დაფიქრდეს, იმ თვალსაზრისით, შესაძლებელია თუ არა, რომ უფრო ფართო, ყოვლისმომცველი შეთანხმების მონაწილეები გახდნენ", — თქვა მან.

დანიელსონი სამუშაო პროცესს ორშაბათიდან, 29 მარტიდან დაიწყებს. როგორც ევროკავშირის წარმომადგენლობაში On.ge-ს განუცხადეს, ის საქართველოში შაბათს ან კვირას ჩამოვა. ჯერ-ჯერობით, შეხვედრების ზუსტი დღის წესრიგი უცნობია.

22 მარტს შარლ მიშელმა განაცხადა, რომ დანიელსონი საქართველოში მედიაციის გასაგრძელებლად დაბრუნდებოდა. მისი თქმით, საქართველოს მოქალაქეების ინტერესებისთვის, კომპრომისებზე წავსლის დროა. დანიელსონის ბოლო ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

დანიელსონი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.