ნაციონალური მოძრაობის ერთ-ერთი ლიდერის, ხატია დეკანოიძის განცხადებით, ხელისუფლება აქციებზე ადამიანების თვლას უნდა შეეშვას, რადგან ეს ყოველთვის "ცუდად მთავრდება". ასე ეხმაურება იგი პრემიერმინისტრის ირაკლი ღარიბაშვილის განცხადებას, რომელმაც თქვა, რომ ოპოზიციის აქციაზე "მხარდამჭერებიც აღარ დადიან".

"გასაგებია, შიშს დიდი თავლები აქვს და როდესაც ხელისუფლებას მოქალაქეების შეგრძნება არა აქვს და მათი პროტესტის შეგრძნება არა აქვს, ის ხელისუფლება არის დასრულებული. ამიტომ, პრობლემების მოგვარებაზე იზრუნონ, თუმცა ვერც ამას აგვარებენ და შესაბამისად, შეეშვან ადამიანების თვლას აქციებზე, იმიტომ, რომ ეს ყოველთვის ცუდად მთავრდება ხოლმე", — თქვა მან.

20 მარტს ოპოზიციამ საკუთარი სამოქმედო გეგმა დააანონსა. ნაციონალური მოძრაობის ერთ-ერთმა წევრმა, ზაალ უდუმაშვილმა თქვა, რომ ისინი მუშაობის "საგანგებო რეჟიმზე" გადადიოდნენ. მისი განცხადებით, აპირებენ ქალაქებსა და სოფლებში ჩასვლას, რათა დაარწმუნონ მოსახლეობა, "რომ ბრძოლას აქვს აზრი". ამასთან, უდუმაშვილი აღნიშნავს, რომ ჩატარდება არაერთი აქცია, მათ შორის, 15 მაისს დიდი აქცია გაიმართება თბილისში.