კულტურის მინისტრმა, თეა წულუკიანმა მოადგილეები წარადგინა, მინისტრის პირველი მოადგილე კახა სიხარულიძე იქნება.

"ბატონი კახა ჩემთან ერთად იმუშავებს საერთაშორისო საკითხებზე, რომელიც მრავლად არის ამ სამინისტროში და მთლიანად სფეროს, არამხოლოდ ჩვენი სამინისტროს სსიპებსა და ორგანიზაციებს, არამედ თითოეულ შემოქმედს ჩვენს ქვეყანაში დაეხმარება, რომ ქართული კულტურა უფრო მეტად გახდეს ხელმისაწვდომი საერთაშორისო ასპარეზზე", — განაცხადა წულუკიანმა.

წულუკიანმა კულტურის, სპორტისა და ახალგაზრდობის მინისტრის მოადგილეებად, ასევე, სოსო გიორგაძე და იოსებ ბაღათურია წარადგინა.

სოსო გიორგაძე საქმიანობას 1 აპრილიდან შეუდგება, ვინაიდან ის ამჟამად იუსტიციის მინისტრის მოადგილის პოსტზეა.

მინისტრის განცხადებით, გიორგაძე ახალგაზრდობის საკითხებს უხელმძღვანელებს და იქნება სპორტის საკითხების კურატორი, ხოლო ბაღათურია სამინისტროს საპარლამენტო მდივანი იქნება, სათავეში ჩაუდგება საქართველოს კულტურის კოდექსის შექმნის პროცესს.

თეა წულუკიანი საქართველოს კულტურის, სპორტისა და ახალგაზრდობის მინისტრად 19 მარტს დაინიშნა.