სენატორ ჯინ შაჰინის განცხადებით, ისეთი არჩევნების ჩატარება, რომელიც ლეგიტიმურობის ზღურბლს აღწევს საკმარისი არ არის. სენატის საგარეო კომიტეტის სხდომაზე მან აღნიშნა, რომ დემოკრატიულ არჩევნებს ძლიერი მექანიზმები უნდა ჰქონდეს, რათა უთანხმოებები გადაწყდეს.

"ისეთი არჩევნების ჩატარება, რომელიც ლეგიტიმურობის ზღურბლს აღწევს საკმარისი არ არის. დემოკრატიულ არჩევნებს უნდა ჰქონდეს იმ ტიპის მექანიზმები, რომელიც დემოკრატიული პროცესის ყველა მონაწილის შეფასებით არის სამართლიანი.

ამერიკა მრავალი წლის განმავლობაში იყო თავისუფალი და დემოკრატიული საქართველოს მეგობარი და მოკავშირე, ეს დღესაც ასეა. მაგრამ ეს მნიშვნელოვანი ურთიერთობა დემოკრატიული ინსტიტუტების გაძლიერების საქმეში საქართველოს ერთგულებაზეა დამოკიდებული", — განაცხადა შაჰინმა.

23 მარტს სენატის საგარეო კომიტეტის სხდომაზე საქართველოში დემოკრატიის მდგომარეობის შესახებ მოსმენა გაიმართა.