საგარეო საქმეთა მინისტრის, დავით ზალკალის განცხადებით, რუსეთის საგარეო დაზვერვის სამსახურის დირექტორის, სერგეი ნარიშკინის გამოხმაურება საქართველოში მიმდინარე მოვლენებზე, "ჰიბრიდული ომის კლასიკური მაგალითია". ამის შესახებ მან მთავრობის სხდომის დასრულების შემდეგ ისაუბრა.

"ეს არის პროვოკაციული განცხადება, ეს არის ჰიბრიდული ომის კლასიკური მაგალითი, თუ როგორ ცდილობს რუსეთის ფედერაცია ასეთ დონეზე, მაღალ დონეზე შემოიტანოს ქართულ საზოგადოებაში დაბნეულობა, დათესოს ნიჰილიზმი და ისე წარმოაჩინოს საკითხი, რომ თითქოს საქართველოსა და მის სტრატეგიულ პარტნიორს შორის არის აბსოლუტური შეუთანხმებლობა ყველა ძირითად საკითხზე.

რა თქმა უნდა, ეს რომ ასე არ არის, ამაზე მეტყველებს კონკრეტული ფაქტები და როგორც არასდროს, ისეთ მაღალ ნიშნულზეა საქართველოსა და მის მთავარ სტრატეგიულ პარტნიორს შორის თანამშრომლობა ყველა მიმართულებით", — თქვა მან.

რუსეთის საგარეო დაზვერვის სამსახურის დირექტორი, სერგეი ნარიშკინი საქართველოში მიმდინარე მოვლენებს გამოეხმაურა. იგი ამტკიცებს, რომ ამერიკა საქართველოში პოლიტიკურ პროცესებს მართავს, ხოლო ქართულმა ოცნებამ მითითებების შესრულებაზე უარი თქვა.

როგორც ნარიშკინი აცხადებს, აშშ წლებია "მექანიკური რეჟიმით" მართავს საქართველოს პოლიტიკურ პროცესებს. რუსეთის დაზვერვის განცხადება დროში ემთხვევა საქართველოში მიმდინარე დაძაბულ პოლიტიკურ პროცესებს, რომელთა მოსაგვარებლად აშშ-სა და ევროკავშირის წარმომადგენლობები ფასილიტატორების როლს ასრულებენ.