საგარეო ურთიერთობათა კომიტეტის თავმჯდომარის, ნიკოლოზ სამხარაძის ინფორმაციით, მოლაპარაკებების შემდეგი რაუნდი მმართველ პარტიასა და ოპოზიციას შორის მიმდინარე კვირაში გაიმართება.

"მომავალ კვირამდე აუცილებლად გაიმართება, ანუ, მომავალი კვირის ორშაბათამდე შემდეგი რაუნდი და მე იმედი მაქვს, რომ რაღაცა პროგრესი ამ მოლაპარაკებებზე იქნება", — განაცხადა სამხარაძემ.

იგი გამოეხმაურა ევროპული საბჭოს პრეზიდენტის, შარლ მიშელის პირადი წარმომადგენლის საქართველოში ჩამოსვლის საკითხს და განაცხადა, რომ მედიაციაში კრისტიან დანიელსონის ჩართვის შემდეგ, საერთაშორისო საზოგადოება უკეთ დაინახავს, ვის უნდა რეალურად მოლაპარაკება და ვის არა.

"კრისტიან დანიელსონი, რომელიც ძალიან კარგად იცნობს საქართველოს და მთლიანად რეგიონს, ჩაერთვება მედიაციის პროცესში. მე დარწმუნებული ვარ, რომ ამ შემთხვევაში, ძალიან ნათლად გამოჩნდება და ევროკავშირიც და მთლიანად, საერთაშორისო საზოგადოებაც ძალიან კარგად დაინახავს, თუ ვინ არის შეთანხმების მომხრე და ვინ არის მოლაპარაკებების ჩაშლის მომხრე", — აცხადებს ნიკოლოზ სამხარაძე.

ევროპული საბჭოს განცხადებაში ვკითხულობთ, რომ შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

ხელისუფლებისა და ოპოზიციის წარმომადგენლებს შორის შარლ მიშელის მონაწილეობით შეხვედრა პრეზიდენტის ადმინისტრაციაში პირველ მარტს გაიმართა. შეხვედრაზე პოლიტიკური დიალოგის განახლების 6-პუნქტიან გეგმაზე იმსჯელეს.

მას შემდეგ, რაც სავრაუდოდ, ირაკლი ღარიბაშვილის, ბერა ივანიშვილისა და ანზორ ჩუბინიძის მონაწილეობით ფარული ჩანაწერი გავრცელდა, მოლაპარაკების გაგრძელება კითხვის ნიშნის ქვეშ დადგა. ოპოზიციის ნაწილმა მოითხოვა, რომ ღარიბაშვილი მოლაპარაკებებს აღარ დაესწროს, თუმცა ოპოზიციის საერთო შეხვედრის შემდეგ პარტიებმა განაცხადეს, რომ მმართველ გუნდს მოლაპარაკების ჩაშლის საბაბს არ მისცემენ.