შინაგან საქმეთა მინისტრის, ვახტანგ გომელაურის განცხადებით, წიწაკის სპრეის გამოყენება დახურულ სივრცეში დაშვებულია. ამის შესახებ მან პარლამენტში ჟურნალისტებს განუცხადა.

"ჩაიხედეთ კანონში, წიწაკის სპრეის გამოყენება პოლიციელს შეუძლია დახურულ სივრცეშიც და ღია სივრცეშიც", — განაცხადა გომელაურმა.

23 თებერვალს ნაციონალური მოძრაობის ოფისში ნიკა მელიას დაკავების სპეცოპერაციისას პოლიციამ წიწაკის სპრეი გამოიყენა. გავრცელებულ ვიდეოებში ჩანდა, რომ სპრეის გაშვების შემდეგ რამდენიმე მოქალაქე ფანჯრის ჩატეხას ცდილობდა, რომ ჰაერი ესუნთქა. სახალხო დამცველის, ნინო ლომჯარიას განცხადებით, დახურულ სივრცეში წიწაკის სპრეის გამოყენება წამებასა და არაადამიანურ მოპყრობას უტოლდება.