საქართველოს საკონსტიტუციო სასამართლოს ვაკანტურ თანამდებობაზე საქართველოს პარლამენტმა უმრავლესობის, ქართული ოცნების წევრი, მანანა კობახიძე აირჩია. პარლამენტმა კობახიძის კანდიდატურას კენჭი რამდენიმე წუთის წინ უყარა.

კობახიძის კანდიდატურას 101-მა დეპუტატმა დაუჭირა მხარი, 10 - წინააღმდეგი იყო. პარლამენტის ამავე გადაწყვეტილებით კობახიძეს პარლამენტის წევრის უფლებამოსილება შეუჩერდა.

ფრაქცია ქართულმა ოცნებამ საკონსტიტუციო სასამართლოს მოსამართლის პოსტზე მანანა კობახიძის კანდიდატურა რამდენიმე კვირის წინ წარადგინა.

გუშინ პლატფორმა არა ფობიამ! განცხადება გაავრცელა. არა ფობიას! წევრი ორგანიზაციები ქართული ოცნების მიერ საკონსტიტუციო სასამართლოს მოსამართლეობის კანდიდატად მანანა კობახიძის დასახელებას შემაშფოთებლად მიიჩნევდნენ. პლატფორმის განცხადებით, კობახიძის მიერ გაკეთებული განცხადებები შეუწყნარებლობისა და დისკრიმინაციის ელემენტებს შეიცავს. გარდა ამისა, მათი თქმით, კანდიდატი მკვეთრად ჰომოფობიური და არასეკულარული მიდგომებით გამოირჩეოდა.