თავდაცვის მინისტრობის კანდიდატის, ჯუანშერ ბურჭულაძის განცხადებით, მას სავალდებულო ჯარი გავლილი არ აქვს. აღნიშნულით მან ალეკო ელისაშვილის მიერ დასმულ კითხვას უპასუხა.

"არ მაქვს მე სავალდებულო ჯარი გავლილი, სამწუხაროდ. თავი არ ამირიდებია, ეს იყო იმით განპირობებული, რომ 17 წლის ასაკში შევქმენი ოჯახი, შემეძინა შვილი, შემდეგ 20 წლის ასაკში დავიწყე მუშაობა", — განაცხადა მინისტრობის კანდიდატმა.

მეორე დღეა საკანონმდებლო ორგანოში მინისტრობის კანდიდატებს უსმენენ. ორშაბათს კი პარლამენტი ახალ პრემიერმინისტრსა და მთავრობის კაბინეტს დაამტკიცებს.

მინისტრთა კაბინეტის ახალი შემადგენლობისა და მთავრობის მეთაურის დამტკიცება მას შემდეგ გახდა აუცილებელი, რაც 18 თებერვალს გიორგი გახარიამ პრემიერმინისტრის თანამდებობა დატოვა.