მთავარმა პროკურორმა ტელეკომპანია იმედის ეთერში, გადაცემა პოლიტიკაში, უარყო ინფორმაცია იმის შესახებ, რომ ე.წ. კაბელების საქმის ფინანსურ დეტალებზე, ყოფილ პრემიერთან, ბიძინა ივანიშვილთან ისაუბრა.

"მე შემიძლია ცალსახად გითხრათ რომ საქართველოს პროკურატურას, ამ საქმის პროკურორებს, ამ საქმის გამომძიებლებსა და პირადად მე, არასდროს არანაირი საუბრები პოლიტიკოსებთან არ გვქონია. ეს არის კანონით აკრძალული, დაუშვებელია და ესეთი რამ საქართველოს პროკურატურაში არ ხდება".

შოთაძის თქმით, დაცვის მხარე ამ ინფორმაციას სპეკულაციებისა და პროკურატურის დისკრედიტაციისთვის იყენებს.

მთავარმა პროკურორმა პირდაპირ ეთერში საქმის დეტალები განიხილა. მისი თქმით, საქმეში არავინ ახსენებს კავკასუს ონლაინს. შოთაძის განცხადებით, თავდაცვის სამინისტრომ აღნიშნულ კომპანიას არ მისცა საშუალება და დრო, რომ ხარჯთაღიცხვა წარმოედგინა:

"ხშირად ახსენებენ მხოლოდ დელტაკომს, მაგრამ არ ახსენებენ კავკასუს ონლაინს. როდესაც შესყიდვა გამოაცხადეს, კომპანიებს მიეცათ 9 დღე იმისათვის რომ წარმოედგინათ ხარჯთაღრიცხვა. კავკასუსმა მისწერა ამის საპასუხოდ თავდაცვის სამინისტროს რომ მოცემული დრო არ იყო საკმარისი ხარჯთაღრიცხვისთვის და ითხოვა დამატებითი დრო თუმცა ეს დრო არავინ არ მისცა".