ევროპული საქართველოს ერთ-ერთი ლიდერი, გიგა ბოკერია ამბობს, რომ პარტიაში ცვლილებები ნებისმიერს შეიძლება შეეხოს. ამის შესახებ მან ჟურნალისტებს პარტიის წევრების შეხვედრამდე განუცხადა.

"დაპირისპირებას კი არ აქვს ადგილი, არამედ დისკუსიას, როგორ უნდა გაგრძელოს პოლიტიკურად ამ რთულ პროცესში პარტიისთვისაც და ქვეყნისთვისაც გაყალბებული არჩევნების შემდეგ პარტიამ მუშაობა. არაფერი ამის მიღმა არ ხდება. შეიძლება დღესვე იყოს რაიმე სახის გადაწყვეტილება, შეიძლება დაგვჭირდეს მეტი დრო. ვერანაირ ახალს ჩემგან ვერ გაიგებთ, იმიტომ, რომ ეს გადაწყვეტილებები მიღებული არ არის. ნებისმიერს შეიძლება შეეხოს [ცვლილებები]", — თქვა ბოკერიამ.

ჟურნალისტების კითხვას, პარტიაში დაგეგმილი ცვლილებები უკავშირდება არჩევნების შედეგებს თუ უგულავა-სააკაშვილის შეხვდრას, ბოკერიამ ასე უპასუხა:

"არა, ეს არ უკავშირდება უგულავა-სააკაშვილის შეხვედრას, ჩემი აზრით, არანაირად".

ბოკერიას არ დაუზუსტებია, შედგა თუ არა ეს შეხვედრა ნამდვილად. On.ge ცდილობს ამ კითხვაზე ევროპული საქართველოს წევრების პასუხების მოპოვებას.

ევროპული საქართველოს ოფისში პარტიის წევრები და ლიდერები შეიკრიბნენ. როგორც ცნობილია პარტიაში სტრუქტურული ცვლილებები იგეგმება, თუმცა რა სახის, ჯერ უცნობია.

ევროპულ საქართველოში დაგეგმილი სტრუქტურული ცვლილებების შესახებ ინფორმაცია On.ge-მ 9 თებერვალს მოიპოვა. გავრცელებული ინფორმაცია, რომ პარტია შესაძლოა დავით ბაქრაძემ დატოვოს, არც თავად მას დ არც პარტიის სხვა ლიდერებს არ დაუდასტურებიათ. თუმცა, ისინი ადასტურებენ, რომ 2020 წლის საპარლამენტო არჩევნების შემდეგ პარტიაში ცვლილებებზე დაიწყეს საუბარი.

გაიგეთ მეტი: