გირჩი შინაგან საქმეთა სამინისტროს ფეისბუკის გვერდზე კითხვების სერიით მიმართავს. ამ კითხვებს პარტიის წევრი ვახტანგ მეგრელიშვილიც ავრცელებს.

გირჩს აინტერესებს, რატომ არიან ისინი თავისუფლები და სხვა მოქალაქეები დასჯილნი და არის თუ არა ეს შსს-ს მხრიდან შერჩევითი სამართლის პრინციპით მოქმედება:

"11 იანვარს თქვენი თანამშრომლები მოვიდნენ და ჩვენი მცენარეები წაიღეს. ყველა ადამიანი, ვინც ახალ წელს „დანაშაული“ ჩავიდინეთ, ვართ თავისუფალი, ხოლო კანაფის დათესვისთვის სხვა მოქალაქეების დევნა და დასჯა გრძელდება".

მეგრელიშვილი ასევე ინტერესდება, რა ბედი ეწიათ გირჩის ოფისიდან წაღებულ მცენარეებს.

შემდეგ კითხვაში, მეგრელიშვილი შსს-ს მიმართავს, ერთი ეკიპაჟის ყოლის შემთხვევაში, რომელ სიტუაციას უფრო გადაუდებელ შემთხვევად ჩათვლიდა, კაცის გაუპატიურების თუ კანაფის დათესვის შესახებ შესულ ინფორმაციას.

მეგრელიშვილის ერთ-ერთი კითხვა ეხება უწყების დაინტერესებას მისი თანამშრომლების მიმართ, როდესაც მათ მოქალაქეები მოსაშარდად (შესამოწმებლად) გადაჰყავთ.

აქვთ თუ არა ინფორმაცია შსს-ს მიმართ გამოთქმულ იმ ბრალდებაზე, რომელიც პოლიციელების მხრიდან ამოღებულ მცირე რაოდენობის მარიხუანაში ბიოს გარევას გულისხმობს.

გირჩის წევრს აქვს კონკრეტული კითხვები შსს-ს მიმართ გია ცერცვაძის საქმეზეც.

გირჩი შინაგან საქმეთა სამინისტროს აღნიშნულ კითხვებს ფეისბუკის პეიჯზე, ერთ-ერთი ბოლო პოსტის კომენტარებში უგზავნის.

უწყებამ პარტიის ერთ კითხვას შემდეგნაირად უპასუხა:

"შინაგან საქმეთა სამინისტრო მზად არის, თქვენ მიერ დასმულ შეკითხვებს კანონით განსაზღვრულ ვადებში უპასუხოს.

შსს-ს საზოგადოებასთან ურთიერთობის დეპარტამენტი პასუხობს, როგორც მედიასაშუალებების წარმომადგენლების, ასევე, საზოგადოების მიერ დასმულ შეკითხვებს.

საზოგადოებასთან ურთიერთობის დეპარტამენტი, კანონმდებლობის შესაბამისად, თავისი კომპეტენციის ფარგლებში, ინფორმაციას გასცემს შინაგან საქმეთა სამინისტროს მიერ განხორციელებული და დაგეგმილი აქტივობების, სიახლეების, მიმდინარე მოვლენებისა და მომხდარი ფაქტების შესახებ. ყველა სხვა ტიპის საჯარო ინფორმაციას გასცემს საჯარო ინფორმაციის სამმართველო.

საჯარო ინფორმაცია ღიაა და ყველასთვის ხელმისაწვდომი, გარდა სახელმწიფო, კომერციულ და პირად საიდუმლოებას მიკუთვნებული ინფორმაციისა. მოთხოვნილი ინფორმაცია გაიცემა დაუყოვნებლივ, ან კანონით გათვალისწინებულ შემთხვევებში - ზოგადი ადმინისტრაციული კოდექსით განსაზღვრულ ვადაში. შესაბამისად, თქვენთვის საინტერესო კითხვები შეგიძლიათ მოგვაწოდოთ შემდეგ მისამართზე: [email protected], ასევე, მოგვწეროთ Facebook-ის საშუალებით.

აქვე, ხაზგასმით აღვნიშნავთ, რომ ყველა ის კომენტარი, რომელიც შეიცავს ნარკოტიკული საშუალებების პროპაგანდას ან სხვა კანონსაწინააღმდეგო ქმედების საჯარო მოწოდება/წაქეზებას, ავტომატურად წაიშლება. ასევე წაიშლება ნებისმიერი შეურაცხმყოფელი შეკითხვა და კომენტარი, იმის მიუხედავად, ვის მიმართ არის გამოთქმული".