ქართული ოცნების ერთ-ერთი ლიდერის, გია ვოლსკის განცხადებით, პარლამენტმა უნდა მისცეს პროკურატურას უფლება, რომ ნიკა მელიას საკითხი სასამართლოს წინაშე დააყენოს, ანუ ის მომხრეა, რომ უწყების მოთხოვნით მელიას მანდატი ისევ შეუჩერონ. მისი თქმით, ამ შემთხვევაში საუბარი არ არის ვინმეს ციხეში ჩასმაზე, არამედ "ქვეყნის ბედსა და სტაბილურობაზე".

"ერთი რამეა, ჩვენ ვაძლევთ პროკურატურას ნებას, რომ სამართლებრივი შეურაცხყოფის საპასუხო პასუხი გადადგას. სამართლებრივი შეურაცხყოფა არ არის იურიდიული ტერმინი, როგორც ასეთი, მაგრამ აქ არის ლაპარაკი იმაზე, რომ შენ აღკვეთის ღონისძიებად არ დაგინიშნეს პატიმრობა, არც შინა პატიმრობა და დაგინიშნეს აღკვეთის ღონისძიება... როდესაც წინა პარლამენტმა მისცა ამის უფლება, რომ სასამართლოში ყოფილიყო საქმე წარმართული, აღკვეთის ღონისძიება დაგინიშნეს, რაღაც გარკვეული პირობით გარეთ ყოფნა. ამ პირობას არ ასრულებ და არც გირაოს არ იხდი, ანუ პარლამენტი უფლებას აძლევს, განიხილოს ეს საკითხი სასამართლომ და გადაწყვიტოს, შეუცვალოს თუა რა აღკვეთის ღონისძიება.

ყოველგვარი ლოგიკა გავალებს, რომ... ახლა არავის ციხეში ჩაჯდომა მე ვერც წარმომიდგენია, რომ ამაზე იყოს ლაპარაკი მხოლოდ, მაგრამ აქ სხვა სიტუაციაა. აქ ქვეყნის ბედსა და სტაბილურობაზეა საუბარი და, რასაკვირველია, უნდა მივცეთ პროკურატურას უფლება, რომ სასამართლოს წინაშე დააყენოს საკითხი", — განაცხადა მან.

5 თებერვალს, გენერალურ პროკურატურაში განაცხადეს, რომ ნიკა მელიას აღმკვეთი ღონისძიების, გირაოს პირობების შესრულებისთვის ერთკვირიან ვადას აძლევენ. თანხის გადაუხდელობის შემთხვევაში პროკურატურა სასამართლოს აღკვეთის ღონისძიების პატიმრობით შეცვლის თაობაზე მიმართავს.

უწყების ცნობით, "მიუხედავად იმისა, რომ ბრალდებულ ნიკა მელიას საკუთრებაში გააჩნია უძრავი ქონება, რომელიც გირაოს უზრუნველსაყოფად საკმარისია, აღკვეთის ღონისძიების პირობა არ შეასრულა".

მელია აცხადებს, რომ პროკურატურის მიერ მოთხოვნილ გირაოს არ გადაიხდის და არც სხვას მისცემს გადახდის უფლებას.

ვინაიდან ნიკა მელიას დეპუტატის მანდატი ჯერ არ შეუწყვეტიათ, ისევ პარლამენტმა უნდა იმსჯელოს, მისცემენ თუ არა პროკურატურას მეორედ მელიას დაკავების უფლებას. შეგახსენებთ, რომ წინა მოწვევის პარლამენტმა მელიას მანდატი შეუწყვიტა.

ნიკა მელიას საქმე

ნიკა მელიას საქართველოს პროკურატურა 20 ივნისის აქციის საქმეზე ძალადობრივი ჯგუფის ხელმძღვანელობას ედავება.

2019 წლის 27 ივნისს თბილისის საქალაქო სასამართლომ მას 30 ათასი ლარის ოდენობის გირაო შეუფარდა. გარდა ამისა, მოსამართლემ სხვა შეზღუდვებიც დაუწესა:

  • საცხოვრებელი ადგილის (სახლის) დატოვება საგამოძიებო ორგანოს ინფორმირებისა და თანხმობის გარეშე;
  • საზოგადოებრივი თავშეყრის ადგილას საჯარო განცხადებების გაკეთება; მოწმეებთან ნებისმიერი სახის კომუნიკაცია;
  • დაეკისრა საგამოძიებო ორგანოსთვის პასპორტისა და პირადობის დამადასტურებელი სხვა დოკუმენტის ჩაბარების ვალდებულება.

2020 წლის 1 ნოემბერს, საზოგადოებრივი თავშეყრის ადგილას საჯარო განცხადების გაკეთებისას, მელიამ ელექტრონული მონიტორინგისთვის განკუთვნილი სამაჯური მოიხსნა.

ამის შემდეგ, პროკურატურამ აღკვეთის ღონისძიების გამკაცრება, კერძოდ, გირაოს გაზრდა 100 000 ლარამდე მოითხოვა. თბილისის საქალაქო სასამართლოს 2020 წლის 3 ნოემბრის განჩინებით, მელიას მიმართ მანამდე გამოყენებული აღკვეთის ღონისძიება გამკაცრდა და გირაოს ოდენობა 40 000 ლარით გაიზარდა.