64 წლის ვლადიმერ მისაბიშვილმა, რომელიც აფხაზეთიდანაა დევნილი, ზეპირ მათემატიკურ გამოთვლაში მსოფლიო რეკორდი დაამყარა.

დევნილთა სამინისტროს ინფორმაციით, მან 100–ციფრიანი რიცხვიდან ზეპირი გამოანგარიშებით 23–ე ხარისხის ფესვი 32 წამში ამოიღო. მიღებული რეზულტატი დაფიქსირდა მსოფლიო რეკორდად და ის საერთაშორისო ორგანიზაციებს გაეგზავნება.

ვლადიმერ მისაბიშვილის ზეპირ გამოთვლას რეკორდების ფედერაციის მსაჯები, საქართველოს მათემატიკოსთა კავშირის წარმომადგენლები და სხვა პროფესორები აკვირდებოდნენ.

ღონისძიება საქართველოს რეკორდების ფედერაციის ორგანიზებითა და საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროსა და ბავშვთა და ახალგაზრდობის ეროვნული ცენტრის მხარდაჭერით გაიმართა.

ვლადიმერ მისაბიშვილი 1951 წლის 29 აგვისტოს, სოხუმში დაიბადა. მან 1975 წელს დაამთავრა საქართველოს ტექნიკური უნივერსიტეტის საინჟინრო ფაკულტეტი და არასდროს უმუშავია მათემატიკური მიმართულებით.