ეკონომიკის მინისტრის, ნათია თურნავას განცხადებით, მოთხოვნის გამკაცრება იმ ობიექტების მიმართ, რომელიც მიზანმიმართულად დაარღვევს წესებს, მხოლოდ რესტორნების წინააღმდეგ არ არის მიმართული.

"არ მინდა ეს იყოს მიჩნეული, რომ რესტორნების წინააღმდეგ არის ეს მიმართული, რადგან ეს შეეხება ყველა ბიზნესს, ვისზეც არის დაწესებული გარკვეული, ასე ვთქვათ, მოთხოვნები და ვინც სარგებლობს სხვადასხვა პროგრამით. პროგრამა ბევრია, ეს არის არამარტო აწარმოე საქართველოში, ეს არის სხვა შეღავათებიც, აქედან გამომდინარე, ეს უნდა იყოს ორმხრივი პასუხისმგებლობა, ამაზეა საუბარი, გამგები გაიგებს", — განაცხადა თურნავამ.

დღეს, 4 თებერვალს პრემიერმინისტრმა, გიორგი გახარიამ განაცხადა, რომ ნებისმიერი ორგანიზაცია, რომელიც დაარღვევს არსებულ შეზღუდვებსა და წესებს მომავალში სახელმწიფოს მხრიდან სუბსიდიასა და დახმარებას ვეღარ მიიღებს.

დაწესებული შეზღუდვების მიუხედავად 6 თებერვლიდან ზოგიერთი რესტორანი გახსნას აპირებს. როგორც გასტრონომიის ასოციაციის ხელმძღვანელმა, ლევან ქოქიაშვილმა განმარტა, სტუმართმასპინძლობის ინდუსტრიის მოლოდინი არ გამართლდა და გონივრული გამოსავლის პოვნის ნაცვლად, ხელისუფლების წარმომადგენლებთან შეხვედრაც გადაიდო. მისივე თქმით, სხვა გამოსავალს ვერ ხედავენ და ამიტომ გახსნას აპირებენ.