შინაგან საქმეთა მინისტრი, ვახტანგ გომელაური ჟურნალისტის კითხვის საპასუხოდ აცხადებს, რომ ინფორმაცია, თითქოს, მასსა და პრემიერმინისტრ გიორგი გახარიას შორის დაპირისპირებაა, სიმართლეს არ შეესაბამება. ჟურნალისტმა მას ჰკითხა, რომ გავრცელებული ინფორმაციით, დაპირისპირების გამო, ის გახარიას კადრებს სამსახურიდან ათავისუფლებს, რაზეც მინისტრმა შემდეგნაირად უპასუხა:

"საბანაძე, ბორცვაძე ჯერ ეს ერთი მუშაობენ [შსს-ში], მეორე, კახა საბანაძე ჩემი კადრი უფროა, ვიდრე გახარიასი. ჩემთან მუშაობდა 5 წელი და გახარია, როცა დაინიშნა ძალოვან უწყებაში, მერე მთხოვა და "მივეცი". კოტე ანანიაშვილიც მუშაობს, ჯერჯერობით", — განაცხადა გომელაურმა.

მან, ასევე, გახარიასთან დაპირისპირებაზე დასმული შეკითხვა უარყო და აღნიშნა, რომ ისინი დიდი ხნის მეგობრები არიან.

"მე და გახარია ვართ უახლოესი ადამიანები, მეგობრები ვართ ძალიან ახლობლები. ძალიან ბევრი ჭორი იყო და მინდა ვთქვა, რომ არანაირი დაპირისპირება არ არის. წლებია მართლა ვმეგობრობთ. დიდი ხანია, ოჯახებით ვმეგობრობთ პირდაპირ შემიძლია გითხრათ და ჩემი კადრები ასეთი რაღაცა მართლა არ არსებობს იქედან გამომდინარე, რომ 8 წელია აქ ვარ და ყველა ეს ადამიანი, ვინც მუშაობს გუშინდელი გარედან მოსული კადრი არცერთი არ არის. ყველანი არიან ძველები, რომლებიც ჩემს დროს მუშაობდნენ, იგივე საბანაძე, იგივე ხოჯევანიშვილი და იყვნენ მაღალ თანამდებობებზე. ჯერ ის დააზუსტეთ, ვინ ვისი კადრია და მერე ილაპარაკოთ უფრო კარგი იქნება", — აღნიშნა გომელაურმა.

მინისტრმა ეს განცხადება პარლამენტში გააკეთა, სადაც ის საკანონმდებლო ორგანოში პარლამენტის ნდობის ჯგუფის სხდომას ესწრებოდა.