2016 წელს, წინა წელთან შედარებით, ფარული საგამოძიებო მოქმედებების რაოდენობა 1,5-ჯერ გაიზარდა. გასულ წელს საქართველოში ფარული საგამოძიებო მოქმედებები ლეგალურად 3 927 ადამიანის მიმართ ჩატარდა, 2015 წელს კი - 2 349 ადამიანის მიმართ. ოფიციალური სტატისტიკური მონაცემები საქართველოს უზენაესმა სასმართლომ გამოაქვეყნა.

ამ მოქმედებების გასატარებლად, გასულ წელს, საგამოძიებო უწყებებმა საქალაქო და რაიონული სასამართლოებს 4 150 შუამდგომლობით მიმართეს. აქედან 92 პროცენტი (3 822) სრულად დაკმაყოფილდა, 2,6 პროცენტი (107) ნაწილობრივ, 4,9 პროცენტი (202) არ დაკმაყოფილდა, დაახლოებით 1 პროცენტის შემთხვევაში კი - საგამოძიებო უწყებებს მასალის განადგურება (33) დაევალათ ან შუამდგომლობები განუხილავი დარჩა (19).

ფარული საგამოძიებო მოქმედების სახეებია: სატელეფონო საუბრის ფარული მიყურადება და ჩაწერა; ინფორმაციის მოხსნა და ფიქსაცია კავშირგაბმულობის არხიდან, კომპიუტერული სისტემიდან; საფოსტო-სატელეგრაფო გზავნილის კონტროლი; ფარული ვიდეო და აუდიოჩაწერა, კინო და ფოტოგადაღება და ელექტრონული თვალყურის დევნება ტექნიკური საშუალებებით.

გასულ წელს ფარული საგამოძიებო მოქმედებებზე ნებართვების შუამდგომლობების ნახევარზე მეტი (2 921) თბილისის სასამართლოში შევიდა, საიდანაც 93 პროცენტზე მეტი (2 725) დაკმაყოფილდა. თბილისი ერთადერთი ადგილი იყო, სადაც მოსამართლეებმა შუამდგომლობების განუხილავად დატოვებისა და მასალის განადგურების გადაწყვეტილება მიიღეს. თუმცა, 2015 წელს შუამდგომლობები განუხილავად ბათუმის (1), ქუთაისის (3), რუსთავის (5), ზუგდიდისა (1) და გურჯაანის (2) სასამართლოებმავ დატოვეს. მასალის განადგურების გადაწყვეტილება კი, თბილისის სასამართლოს მსგავსად ბათუმის (1), ქუთაისის (3), რუსთავისა (1) და თელავის (1) სასამართლოებმა მიიღეს.

თბილისის გარდა, ფარული საგამოძიებო მოქმედებების შუამდგომლობებით მიმართვის ყველაზე მეტი შემთხვევა ბათუმში (207 მიმართვიდან დაკმაყოფილდა 198), ქუთაისში (188 მიმართვიდან დაკმაყოფილდა 176), რუსთავსა (141 მიმართვიდან დაკმაყოფილდა 140) და გორში იყო (110 მიმართვიდან დაკმაყოფილდა 104).

სასამართლოებმა საგამოძიებო სამსახურების ყველა მიმართვა სრულად დააკმაყოფილეს ოზურგეთში (48), ფოთში (27), საჩხერეში (12), გურჯაანში (11), ცაგერსა (4) და ახალქალაქში (2). ყველაზე მაღალი მაჩვენებელი, შუამდგომლობების არ დაკმაყოფილების, თელავში დაფიქსირდა. 78 შუამდგომლობიდან თელავის სასამართლომ 23 (29,5%) არ დააკმაყოფილა.

საქართველოს უზენაეს სასამართლოს ფარული საგამოძიებო მოქმედებების სტატისტიკური მონაცემების გამოქვეყნების ვალდებულება 2014 წლის 1 აგვისტოდან დაეკისრა. უწყება ამ მონაცემებს ამავე წლის 18 აგვისტოდან ამუშავებს.

საქართველოს უზენაესი სასამართლოს მონაცემებით, 2014 წლის 18 აგვისტოდან 31 დეკემბრის პერიოდში, ფარული საგამოძიებო მოქმედებების შესახებ სასამართლოებმა 936 შუამდგომლობა მიიღეს, საიდანაც 596 სრულად დაკმაყოფილდა, 78 კი - ნაწილობრივ.