პარტია მოქალაქეების ლიდერის, ალეკო ელისაშვილი ამბობს, რომ ოფისში მხარდამჭერების რიგი დგას, რომლებიც მათ პარლამენტში შესვლას ითხოვენ. ელისაშვილის თქმით, ეს ხალხი სუს-ის ან ქართული ოცნების შტაბიდან გამოგზავნილები კი არა, პარტიის ალალი ამორჩევლებია.

"ლამის გვაჯანჯღარებენ მე და ლევან იოსელიანს, რომ შედით პარლამენტშიო. ხალხი, პირდაპირ ჩვენი მხარდამჭერები მოდიან და ლამის გვეჩხუბებიან, რომ შედით, რა დროს ესაა, ნუ ხართ იმათ აყოლილებიო", — განაცხადა ელისაშვილმა TV პირველის ეთერში.

ოპოზიციური პარტიები, რომლებმაც ცესკოს მონაცემებით ბარიერი გადალახეს ბოიკოტის რეჟიმში არიან და პარლამენტში შესვლაზე უარს ამბობენ, ამიტომ პარლამენტი ერთპარტიულია და მხოლოდ ქართული ოცნების დეპუტატებითაა დაკომპლექტებული. პარტიების უმეტესობამ მანდატებზე უარი თქვა და საპარლამენტო სიებიც ჩახსნა. დანარჩენები კი ფასილიტატორების ჩართულობით მმართველ გუნდთან მოლაპარაკებებს ელოდებიან და მხოლოდ ამის შემდეგ აპირებენ მანდატებზე უარის თქმას ან პარლამენტში შესვლას.